Teksa mbrojtësi i Barcelonës, Ronald Araujo, ende po bisedon me klubin për mundësinë e rinovimit, thashethemet mbi të ardhmen e tij sa vijnë e shtohen. Së fundmi, një lajm i bujshëm mendohet të ketë vënë në lëvizje të gjithë drejtuesit e klubit katalanas. Agjenti i lojtarit, Edmundo Kabchi ka pasur një takim me trajnerin e Manchester City, Pep Guardiola.
Kabachi, i cili në të njejtën kohë është pronari i klubit Albacete, është një nga agjentët futbollistikë më të mëdhenj në Amerikën Latine. Ai ishte personi kryesor që u kujdes për transferimin e Araujo tek katalanasit, por tani duket se ka ndër mend një tjetër plan për të ardhmen e mbrojtësit.
Momentalisht uruguajani është nga lojtarët më pak të paguar te Barcelona, pavarësisht rolit të tij mjaft të rëndësishëm në ekipin e trajnerit Xavi. Kontrata e tij me spanjollët skadon vitin e ardhshëm dhe Ronald pretendon të ketë të njejtën pagë si Ferran, Pedri apo Ansu Fati, pra rreth 6 milionë euro në vit. Kjo ka qënë dhe arsyeja se përse Araujo ka refuzuar propozimin e parë të klubit për rinovim.
Përsa i përket takimit të Guardiolës me agjentin e lojtarit, në rrjet ka qarkulluar dhe një foto e të dyve gjatë takimit. Kjo gjë mendohet se nuk ka qënë e rastësishme, por një mesazh i qartë drejtuar Barcelonës. Katalanasit duhet të vijnë me një propozim shumë më të mirë nëse duan të mbajnë gardianin e tyre të mbrojtes në ekip, dhe në vitet në vijim.
Sipas Marca në Spanjë, ekziston një hendek i madh mes asaj që kërkon Araujo, dhe asaj që mund të ofrojë klubi. Për këtë arsye Barcelona po përgatitet për largimin e mundshëm të tij, duke ndjekur alternativa të tjera për repartin e mbrojtjes. Një prej tyre është Cesar Azpilicueta i Chelsea, i cili mund të vijë me kosto zero në Camp Nou verën e këtij viti.