Raportimet më të fundit në Itali bëjnë me dije se mbrojtësi i Chelsea, Antonio Rudiger, ka pranuar të firmosë një kontratë 4 vjeçare me Juventus. 29-vjeçarit i skadon kontrata në fund të sezonit dhe blutë e Londrës nuk mund t’i ofrojnë atij një rinovim për shkak të sanksioneve të qeverisë, të vendosura ndaj pronarit të klubit Roman Abramovich.
Përpara sanksioneve që iu vendosën Chelsea, Rudiger ishte përfolur se po konsideronte një zgjatje të kontratës me klubin. Ai ka konsoliduar pozitat e tij në ekipin e Tuchel, si një talent i jashtëzakonshëm, që kur u bashkua për 31 milionë paundë nga Roma në vitin 2017. Por tani duket se lojtari do të kthehet përsëri në Itali.
Sipas La Gazzetta dello Sport, Rudiger i ka thënë “Po” Juventus, duke zgjedhur “Zonjën e Vjetër” mbi Real Madrid dhe Bayern Munich, që gjithashtu kishin shprehur interes për shërbimet e tij. Në Torino Rudiger pritet të fitojë rreth 5.4 milionë paundë në sezon.
Trajneri i Chelsea, Thomas Tuchel, pranoi javën e kaluar se zhvillimet e fundit që kanë ndodhur me klubin e tij mund të kenë efekt mbi lojtarët që po negociojnë për një rinovim kontrate. Ky mund të jetë dhe rasti i Rudiger. Tekniku gjerman u shpreh:
“Konkluzioni është se nuk kemi se çfarë të bëjmë. Nuk i dihet asnjëherë, mund të ketë një impakt pozitiv, por dhe negative. Nuk mund të parashikojmë skenare dhe nuk duhet ta bëjmë, pasi humbasim përqëndrim. Shpresoj për rezultatin më të mirë në fund dhe mendoj se ende kemi shumë për të ofruar. Chelsea është një klub i fortë dhe do të vazhdojë të jetë.”
Antonio Rudiger luan një rol mjaft të rëndësishëm në prapavijën e bluve dhe largimi i tij në çfarëdo lloj skenari, do të linte një hendek në parapavijën e Chelsea.