Trajneri i Ajax, Alfred Schreuder, ka dhënë një mesazh të qartë në lidhje me të ardhmen e sulmuesit Antony. Sipas Schreuder, braziliani do të qëndrojë tek hollandezët, pavarësisht interesimit të një sërë klubesh europiane për kartonin e tij. Antony është përfolur së fundmi për një ribashkim me trajnerin e tij të vjetër, Erik ten Hag, tek Manchester United.
Megjithatë, marrëveshja ka dështuar të konkretizohet. I pyetur për ESPN Netherlands, tekniku i Ajax, Alfred Schreuder, ka komentuar mbi situatën e Antony duke thënë:
“Mendoj se ai (Antony) do të qëndrojë. Sigurisht, ne kemi shitur shumë lojtarë së fundmi. Kjo gjë nuk ka ndodhur në vitet e fundit. Gjithashtu kemi blerë lojtarë. Por kemi shitur kaq shumë lojtarë saqë mendoj se askush nuk dëshiron që të largohet.”
Sipas burimeve jo zyrtare, deklarata ka irrituar Antony dhe agjentin e tij Junior Pedroso, që duket se janë të dy pro për një lëvizje drejt Manchester United.
Schreuder gjithashtu u pyet nëse lojtarëve të Ajax i është vënë një afat kohor për të vendosur nëse duan të largohen apo jo në këtë merkato vere. Në lidhje me këtë, trajneri u shpreh:
“Jo, nuk e kemi diskutuar këtë gjë. Por flasim me njëri-tjetrin çdo ditë. Mendoj se askush nuk do të largohet. Nëse shesim një tjetër lojtar kyç këtë sezon nuk do të ishte mirë për ne.”
United ndërkohë ka rënë dakord me Ajax për transferimin e Lisandro Martinez. Kartoni i këtij të fundit do t’i kushtojë “Djajëve të Kuq” 57.4 milionë euro, por shifra mund të shkojë deri në 67.4 milionë pas shtimit të disa bonuseve. Ten Hag ndërkohë ka përforcuar ekipin me afrimet e Tyrell Malacia dhe Christian Eriksen. United ndërkohë mbetet ekipi favorit për të firmosur me yllin hollandez të Barcelonës, Frenkie de Jong.
