Sipas raportimeve në Itali, Fiorentina është gati të shesë Dusan Vlahovic tek Arsenal. Kjo pasi londinezët kanë ofruar të paguajnë 58.5 milionë paundë për shërbimet e sulmuesit serb. Arsenal po përgatitet për një të ardhme pa Pierre-Emerick Aubameyang dhe Alexandre Lacazette, kontrata e të cilëve skadon në verë.
Vlahovic ka hyrë në 18 muajt e fundit të kontratës së tij me Fiorentinën, dhe ka tërhequr vëmendjen e një sërë klubesh europiane, me paraqitjet e tij të jashtëzakonshme dhe golat në Serie A, por jo vetëm. Deri më tani, drejtuesit e Fiorentinës kanë shpresuar se Vlahovic do t’i jepte fund spekullimeve, duke firmosur rinovimin e kontratës. Por duket se serbi është i vendosur të largohet, pavarësisht dëshirës së presidentit Rocco.
Nga ana tjetër, Arsenal është gjithashtu i interesuar në shërbimet e Dominic Calvert-Lewin të Everton dhe Alexander Isak të Real Sociedad. Por trajneri Arteta e di mirë se sulmuesi i Fiorentinës është opsioni më tërheqës për planet e tij. Ish-futbollisti i njohur Ian Wright inkurajoi Arsenal që të ecë përpara me bisedimet për kartonin e Vlahovic. Ai gjithashtu komentoi për të ardhmen e Aubameyang dhe Alexandre Lacazette. Wright u shpreh:
“Arsenal ka bërë biznes në mënyrë fantastike deri më tani. Besoj se u duhet dhe një sulmues, pavarësisht nëse situata me Aubameyang zgjidhet. Kam dëgjuar se sulmuesi mund të jetë Vlahovic i Fiorentinës. Na duhet një lojtar që të mund të luajë mes Lacazette dhe Aubameyang.”
Wright shtoi:
“Nuk e di se çfarë do të ndodhë me Laca, dua që ai të qëndrojë, por nuk e di se çfarë do të ndodhë me të, por dhe me Aubameyang. Por nëse ia dalim të sjellim në ekip një sulmues që është golashënues i mirë dhe di të organizojë lojën, si Vlahovic, gjëra të mira do të vijnë për Arsenal.”
