Lisandro Martinez është mbrojtësi i Ajax që ka vendosur në garë Arsenal dhe Manchester United. “Topçinjtë” e Mikel Artetës kanë bërë një ofertë zyrtare për argjentinasin, i cili është gjithashtu nën radarin e Erik ten Hag. Ky i fundit e njeh mjaft mirë Martinez, duke qënë se kanë punuar së bashku në kohën që trajneri hollandez drejtonte Ajax.
Por pavarësisht këtij fakti, duket se Arsenal po kryeson garën për kartonin e mbrojtësit të talentuar. Londinezët kanë ofruar 35 milionë paundë për Lisardo Martinez, dhe sipas raportimeve të mediave angleza janë të gatshëm të shpenzojnë akoma më shumë. Kjo gjë pritet të nxisë dhe “Djajtë e Kuq” që të vijnë shumë shpejt me një ofertë zyrtare, sidomos pas dështimit për të siguruar kartonin e Jurrien Timber.
Ky i fundit gjithashtu aktivizohet për Ajax, dhe ishte objektivi numër 1 i trajnerit Ten Hag për qendrën e mbrojtjes. Por lojtari u këshillua nga trajneri i Hollandës, Louis van Gaal, që të mos i bashkohej United. Timber e dëgjoi këshillën e Van Gaal duke marrë parasysh se një lëvizje drejt Old Trafford vetëm 6 muaj përpara Kupës së Botës, është një risk shumë i madh për t’u ndërmarrë në këtë moment.
“Djajtë e Kuq” ende nuk kanë bërë asnjë blerje në këtë merkato vere, ndërkohë që kanë humbur 5 lojtarë titullarë: Paul Pogba, Juan Mata, Jesse Lingard, Nemanja Matic dhe Edinson Cavani. Presioni për të përforcuar skuadrën është i lartë nga fansat, sidomos duke marrë parasysh faktin se rivalët e “Djajëve të Kuq”, Manchester City dhe Liverpool, kanë afruar disa lojtarë të rinj në klub.
Lajmi më premtues për United është situata me Frenkie De Jong, i cili duket se do të lërë Barcelonën për t’u transferuar në Old Trafford për shifrën e 68 milionë paundëve.
