Sipas raportimeve më të fundit të The Sun, Arsenal po përgatit një ofertë për të siguruar shërbimet e mesfushorit Philippe Coutinho në merkaton e ardhshme. Braziliani ka rigjetur përsëri formën e tij më të mirë me Aston Villa, pas një periudhe të vështirë tek Barcelona.
Momentalisht 29 vjeçari luan si i huazuar për ekipin e Steven Gerrard, dhe është kthyer në një pikë referimi në fushë për të gjithë skuadrën. Kjo mund të shtyjë drejtuesit e klubit që të blejnë përfundimisht kartonin e lojtarit, duke i paguar Barcelonës shifrën prej 33.7 milionë paundësh. Por operacioni mund të ndalet nëse Arsenal vendos të hyjë në lojë me një ofertë më të mirë.
Topçinjtë fituan 1-0 ndaj Aston Villës ditën e shtunë, duke rritur ndjeshëm shanset e tyre për të luajtur në Champions League sezonin e ardhshëm. Kjo padyshim që favorizon ekipin e Mikel Artetës dhe në garën për kartonin e Coutinho, i cili sigurisht që dëshiron të luajë në kompeticionin prestigjoz. Duke qënë se Aston Villa ndodhet momentalisht në vendin e 9 në renditjen e Premier League, ajo nuk mund t’ia sigurojë këtë mundësi brazilianit.
Coutinho, i cili u aktivizua dhe në humbjen ndaj Arsenal, ka luajtur 10 ndeshje për ekipin e Steven Gerrard. Sulmuesi ka shënuar 4 gola dhe ka dhënë 3 asiste duke kontribuar në formën e mirë të klubit.
Trajneri Gerrard u pyet disa ditë më parë mbi mundësinë e blerjes përfundimtare të kartonit të Coutinho. Tekniku uli entuziasmin duke thënë:
“Për mua nuk ka sens që të marrim vendime tani…Ne e dimë se kemi të bëjmë me një talent të klasit botëror. Duhet të shijojmë lojën e tij, ta mbajmë në top-formë deri në fund të sezonit, dhe më pas jam i sigurtë që Coutinho do të na ndihmojë.”