Londinezët e Arsenal po targetojnë jo vetëm 1, por 2 nga lojtarët e Juventus në Itali. Mikel Arteta kërkon shërbimet e dyshes Arthur – Kulusevski, pasi trajneri spanjoll beson se braziliani dhe suedezi, janë përforcimi i duhur për arritjen e objektivave të skuadrës së tij. “Topçinjtë” shpenzuan shumë para gjatë merkatos së verës, por duket se janë ende në kërkim të lojtarëve të rinj.
Në lidhje me kartonin e Kulusevski, anglezët kanë hyrë tashmë në bisedime me italianët. Ekipi i Arteta po shpreson të përfitojë shërbimet e suedezit për shifrën e 29.5 milionë eurove, plus bonuse. Por sipas raportimeve, “Zonja e Vjetër” kërkon 40 milionë euro për shërbimet e lojtarit. 21 vjeçari u bë pjesë e Juventus në verën e vitit 2020, pasi ra në sy për paraqitjet e tij gjatë periudhës kur aktivizohej me skuadrën e Parmës.
Gjithsesi, nën drejtimin e Andrea Pirlo, futbollisti e pati të vështirë të gjejë hapësira në formacionin bazë, dhe kjo gjë duket se nuk ka ndryshuar as me Massimiliano Allegrin në krye të pankinës.
Arthur ndërkohë është në një pozicion të ngjashëm përsa i përket minutave të luajtura. Allegri preferon Manuel Locatellin dhe Rodrigo Bentancur në vend të brazilianit, dhe për këtë arsye, mesfushori kërkon largimin nga “Zonja e Vjetër”.
Ish-mesfushori i Arsenal, Aaron Ramsey, gjithashtu mund të bëjë një rikthim spektakolar tek londinezët. Mediat në Itali bëjnë me dije se Juventus mund të ndërpresë kontratën me uellsianin, teksa ky i fundit ka luajtur vetëm 98 minuta lojë këtë sezon.
Rikthimi i Ramsey është një ide që ka rikthyer nostalgjinë e fansave të Arsenal, dhe 30 vjeçari mund të jetë pikërisht ajo çka i duhet ekipit të Arteta. Mesfushori mund të shërbejë si një busullë orientimi, për të gjithë talentet e rinj që trajneri spanjoll ka integruar në ekip.