Drejtuesit e Arsenal i kanë vetes dy objektiva mjaft madhorë për merkaton e verës. Ekipi i Mikel Artetës është i interesuar për shërbimet e yllit të Atletico, Joao Felix, si dhe mesfushorit të Barcelonës, Sergi Roberto.
“Topçinjtë” duan të përforcojnë repartin e sulmit për sezonin e ardhshëm pas largimit të Pierre-Emerick Aubameyang dhe largimeve potenciale të Eddie Nketiah dhe Alexandre Lacazette. Felix do të ishte një zëvëndësues perfekt, por kostoja e kartonit të portugezit është problemi më i madh për të bërë të mundur lëvizjen. Spanjollët kërkojnë plot 120 milionë euro për lojtarin dhe nga Arsenal nuk ka ende asnjë shenjë se janë të gatshëm për të paguar këtë shifër.
Megjithëse Felix erdhi me mjaft bujë në Madrid nga skuadra e Benficas, impakti i tij nuk ka qënë ai që fansat e Atletico kishin parashikuar. Sulmuesi ka shënuar vetëm 3 gola deri më tani gjatë këtij sezoni, por një aventurë e re në Premier League mund të rizgjojë anën më të mirë të Felix. Kjo është dhe arsyeja se përse Arsenal po e konsideron seriozisht lojtarin si një opsion.
Ndërsa përsa i përket Sergi Robertos, mesfushori i Barcelonës duket një objektiv disi më i arritshëm. Lojtari nuk është aktivizuar me katalanasit që prej tetorit të kaluar për shkak të një dëmtimi serioz, dhe është në rrugën e rikuperimit. Kontrata e tij me Barcelonën skadon në fund të sezonit dhe duke marrë parasysh dëmtimin e Roberto, por dhe gjendjen financiare të Barcelonës, prestigjozja Marca ka raportuar se klubi po i jep prioritet lojtarëve më të rëndësishëm.
Trajneri Xavi e ka cilësuar Sergi Roberton si një lojtar mjaft të talentuar, por gjithashtu ka nënvizuar dhe një herë situatën financiare të klubit. Mesfushori ka fituar gjithçka me Barcelonën dhe mendohet se është i prirur të provojë një aventurë të re diku tjetër. Nëse dëshira e tij konfirmohet, Arsenal është gati të bëjë një ofertë zyrtare.