Londinezët e Arsenal kanë kontaktuar Juventus, për mundësinë e afrimit në formë huazimi të mesfushorit brazilian Arthur Melo. Ekipi i Mikel Artetës po kërkon të përforcojë repartin e mesfushës, duke marrë parasysh se Thomas Partey dhe Mohamed Elneny nuk janë të disponueshëm për shkak të AFCON. Në të njejtën kohë, Ainsley Maitland-Niles iu bashkua Romës në formë huazimi, që do të thotë se Arsenal duhet me patjetër të sjellë një mesfushor të ri në ekip.
Por në çfarë faze janë bisedimet për Arthur? Juventus është parimisht dakord për një marrëveshje, por italianët nuk mund të vazhdojnë përpara me negociatat, në qoftë se nuk gjejnë fillimisht një zëvëndësues. “Zonja e Vjetër” është e interesuar në shërbimet e Bruno Guimaraes të Lyon, një lojtar që vet Arsenal është duke e monitoruar. Por financat mendohet se janë një problem potencial, që mund të pengojë Juventus në arritjen e objektivit Guimaraes.
Gjithsesi, mediat italiane janë të bindura se klubi do të gjejë një mesfushor, duke i hapur rrugën largimit të Arthur Melo.
Por Arsenal ka gati dhe planin B, në rast se skenari “Arthur” nuk realizohet. Drejtuesit londinezët po monitorojnë dhe Youri Tielemans të Leicester City. Agjenti i lojtarit thuhet se ka biseduar me përfaqësuesit e Arsenal rreth një transferimi potencial. Tielemans ka dhe 18 muaj kontratë aktive në King Power Stadium dhe burimet pranë klubit thonë se lojtari nuk pritet të firmosë një rinovim.
Por Arsenal nuk është i vetmi ekip i interesuar në shërbimet e Tielemans. Shumë klube të tjera në Premier League po ndjekin situatën e Tielemans, por është e drejtë të thuhet se Arsenal është ekipi që ka më shumë nevojë për një mesfushor.
Në ndeshjen përballë Nottingham Forest, trajneri Arteta u detyrua të hidhte në fushë 18 vjeçarin Charlie Patino. Ndërkohë Albert Sambi Lokonga luajti në vendin e Granit Xhakës.
