Arsenali i Mikel Artetës është duke përgatitur listën e objektivave për merkaton e janarit. Mes emrave të linkuar për një transferim të mundshëm tek “topçinjtë”, është dhe ai i sulmuesit të Everton, Dominic Calvert-Lewin. Trajneri spanjoll i Arsenal e shikon futbollistin si zëvëndësuesin perfekt për Alexander Lacazette, i cili pritet të largohet në verë.
Ky është një tjetër lajm negative për trajnerin e Everton, Rafa Benitez. Tekniku pranoi publikisht se dëmtimi i Calvert-Lewin ka prishur planet dhe strategjinë e tij të lojës. Në rast se lojtari largohet përfundimisht nga klubi, kjo mund të jetë një goditje e madhe për trajnerin spanjoll.
Sulmuesi anglez ka një kontratë aktive me klubin deri në vitin 2025. Ndërkohë Benitez nga deklaratat e tij ka lënë të kuptohet se do të luftojë deri në fund për të mbajtur në klub, lojtarët e tij të rëndësishëm. Megjithatë, situata është e komplikuar.
Vet trajneri i Everton ka deklaruar se klube si Liverpool kanë arritur sukses duke shitur lojtarë dhe grumbulluar fonde, në momentin e duhur. Kjo do të thotë se në qoftë se Arsenal ofron një shifër relativisht të lartë për shërbimet e Dominic Calvert-Lewin, mund të jetë në interesin e Everton që të pranojë ofertën.
Sulmuesi është zhvilluar shumë tek Everton gjatë dy sezoneve të fundit, nën drejtimin e trajnerit Carlo Ancelotti. Paraqitjet e tij mbresëlënëse i siguruan lojtarit një vend në kombëtaren angleze gjatë europianit, por këtë sezon situata duket më e vështirë për futbollistin. Një dëmtim në kofshë do ta mbajë atë jashtë fushave, të paktën deri në fund të muajit. Kjo gjë mund të ndikojë dhe në ofertën financiare që Arsenal do të përgatisë për lojtarin. Por pavarësisht dëmtimit, Dominic Calvert-Lewin ngelet një futbollist me mjaft potencial, që mund të jetë zgjidhja perfekte për Arsenalin në zhvillim të Mikel Artetës.
