“Topçinjtë” e Arsenal kanë bërë një tjetër goditje këtë merkato verore. Londinezët kanë mbyllur me sukses marrëveshjen për transferimin e mesfushorit të Anderlecht, Albert Sambi Lokonga, në Londër. Megjithëse shifra e transferimit nuk është bërë publike, burime jo zyrtare bëjnë të ditur se ajo mund të jetë rreth 17.2 milionë paundë. 21 vjeçari i cili aktivizohet me Belgjikën U21 do të bëjë kështu shumë shpejt, debutimin e tij në Premier League.
Lokonga iu bashkua klubit të Anderlecht kur ishte vetëm 15 vjeç. Në shtator të vitit 2017 ai bëri debutimin me ekipin e parë, dhe që prej atij çasti, ka zhvilluar 78 paraqitje me klubin, duke shënuar 3 gola. Trajneri i Arsenal, Mikel Arteta u shpreh mjaft i kënaqur për transferimin, ai u shpreh:
“Albert është një lojtar shumë inteligjent që ka treguar maturi. Ai është trajnuar nga Vincent Kompany dhe skuadra e tij te Anderlecht. E njoh Vincent mjaft mirë dhe ai e vlerëson shumë rolin dhe impaktin e Albert te ekipi gjatë sezoneve të fundit. Jemi të bindur se ai është gati për fazën tjetër të rritjes në karierrën e tij, dhe mirëpresim me krahë hapur një lojtar të ri në skuadrën tonë.”
Drejtori teknik i Arsenal, Edu, gjithashtu komentoi mbi transferimin e futbollistit:
“Interesi për Albert ishte i lartë dhe për ne ishte një ndër objektivat kryesorë këtë merkato. Jam i sigurtë se ai do të forcojë qendrën e mesfushës.”
Mesfushori do të mbajë veshur fanellën me numrin 23, me mbishkrimin Sambi sipër saj. Lojtari ka zhvilluar 7 paraqitje me kombëtaren belge U21, dhe ia ka dalë të shënojë 2 gola. Lokonga pritet t’i bashkohet shumë shpejt shokëve të tij të skuadrës, pasi futbollisti ka plotësuar me sukses kushtet e lëvizjes, për shtetasit e huaj që vijnë në Mbretërinë e Bashkuar.