Declan Rice është objektivi kryesor i Arsenal këtë verë, dhe drejtuesit e klubit londinez janë gjithnjë e më konfidentë se mund të sjellin talentin e West Ham në Emirates. Arsenal po kalon një sezon fantastik dhe drejtuesit e klubit janë të gatshëm të mbështetin financiarisht trajnerin Arteta në kërkesat e tij për lojtarë të rinj, dhe tekniku spanjoll i ka të qarta objektivat.
Rice shihet si lojtari ideal për mesfushën e londinezëve, duke qënë se është i ri, mjaft i talentuar, dhe ka ëndërr të luajë në Champions League, njësoj si lojtarët e tjerë të ekipit. Drejtuesit e West Ham duket se e kanë pranuar tashmë faktin se mesfushori do të largohet në verë, pavarësisht qëndrimeve të mëparshme në lidhje me kartonin e anglezit.
Për momentin ende nuk ka bisedime direkte mes Arsenal dhe lojtarit, duke qënë se ky i fundit është i përqëndruar tek West Ham, pasi klubi rrezikon rënien nga kategoria. West Ham gjithashtu luan dhe në Europa Conference League këtë sezon.
Arsenal ndodhet 8 pikë para në krye të Premier League, dhe kjo i bën londinezët një projekt mjaft tërheqës për të gjithë lojtarët, sidomos ata të rinj, duke marrë parasysh zhvillimin e tyre të suksesshëm nën drejtimin e trajnerit Mikel Arteta.
Chelsea gjithashtu ka kohë që admiron Rice, por blutë e Londrës ndodhen në një moment mjaft të vëshitrë. Rice ka një marrëdhënie të ngushtë me lojtarin e bluve, Mason Mount, por e ardhmja e këtij të fundit në Stamford Bridge mbetet e paqartë. Për më shumë, Chelsea ka pak shanse të kualifikohet në Champions League sezonin e ardhshëm.
Manchester United gjithashtu ka mbajtur Rice nën monitorim, ndërkohë që Manchester City është në kërkim të një mesfushori të ri. Kjo pritet të ngrejë akoma më lart shifrën e kartonit të Rice, por drejtuesit e Arsenal kanë besim tek projekti i tyre.
