Londinezët e Arsenal kanë arritur një marrëveshje paraprake, për transfermin e mbrojtësit Ben White nga klubi i Brighton, për shifrën e 50 milion paundëve. Lojtari ishte pjesë e Anglisë së Gareth Southgate në Euro 2020, megjithëse selektimi i tij, erdhi si nevojë për të zëvëndësuar Trent Alexander-Arnold, i cili u dëmtua.
Transferimi është një hap mjaft i madh për 23 vjeçarin, i cili është produkt i akademisë së Southampton. Gjatë sezonit 2019-2020 lojtari ishte pjesë e Leeds në formën e një huazimi. Atje ai jo vetëm fitoi titullin kampion në Championship, por dhe tërhoqi vëmendjen e mjaft klubeve të mëdha në Premier League. Rezultatet e White vendosën në pozita mjaft të mira Brighton, që zotëronte kartonin e futbollistit. Përpara rënies dakord me Arsenal, Brighton kishte refuzuar 2 oferta të mëparshme të “topçinjëve”.
Transferta vjen në një moment mjaft të rëndësishëm dhe të nevojshëm për londinezët e drejtuar nga Mikel Arteta. Kjo pasi klubi përfundimisht nuk do të ketë më shërbimet e mbrojtësit brazilian David Luiz. Lojtarit i skadoi kontrata me Arsenal, dhe asnjëra palë nuk tregoi vullnet për të gjetur një marrëveshje të re. Trajneri Arteta shprehu keqardhjen e tij për largimin e lojtarit. Sipas numrit 1 të pankinës së Arsenal, diskutimet me Luiz kishin vazhduar për një kohë të gjatë, deri në momentin që palët vendosën të mos negocionin për një kontratë të re.
Londinezët gjithashtu kanë bërë një tjetër goditje mjaft të mirë këtë merkato verore, me transferimin e Nuno Tavares nga Benfica. 21 vjeçari luan si mbrojtës i majtë, dhe trajneri Arteta e ka konsideruar si një futbollist mjaft premtues dhe që është rritur mjaft mirë si lojtar. Portugezi është aktivizuar 25 herë me Benfica dhe gjithashtu, ka luajtur për kombëtaren portugeze U21. Ardhja e tij do t’i shtojë energjitë dhe opsionet në kampin difensiv të Arsenal.
