Arsenal është i hapur për të marrë parasysh, ofertat e ndryshme për kartonin e Pierre-Emerick Aubameyang. Sipas raportimeve më të fundit, klubi anglez ka vendosur të mos pengojë sulmuesin, në rast se ai shpreh dëshirën për t’u larguar nga “topçinjtë”. Megjithëse për shumë kohë, 32 vjeçari shihej si pikë mjaft e rëndësishme në ekipin e Mikel Arteta, duket se futbollisti nga Gaboni nuk është më i pazëvëndësueshëm.
Aubameyang ka dhe dy vite të mbetura në kontratën e tij aktuale me Arsenal, nga e cila futbollisti përfiton rreth 250,000 paundë në javë. Kjo shifër është mjaft e lartë dhe sipas të gjitha gjasave, kërkesat financiare të sulmuesit do të jenë një problem për të të gjitha klubet që janë të interesuara në shërbimet e tij.
Nga ana tjetër, rivalët e Chelsea po mendojnë për një tjetër goditje në merkato, në prag të mbylljes së saj. Kësaj rradhe objektivi është mesfushori francez i Sevilla, Jules Kounde. Lojtari ka një klauzolë prej 77 milionë eurosh për prishjen e kontratës, shifër e cila është e lartë për Chelsea, që shpenzoi plot 98 milionë paundë për të afruar Lukakun nga Inter.
Megjithatë, blutë e Londrës po shpresojnë të përfshijnë në marrëveshje Kurt Zouma, që aktivizohet si mbrojtës qendre me ekipin. Kjo sigurisht që do të ulte kostot për transferimin e Kounde. Problemi i vetëm është dëshira e Kurt Zouma, i cili sipas raportimeve, thuhet se nuk parapëlqen një lëvizje drejt Andalusia.
Ndërkohë, Manchester United duket se nuk ka hequr dorë nga mesfushori i Rennes, Eduardo Camavinga. Talenti 18 vjeçar ka tërhequr vëmendjen e klubeve të mëdha europiane, dhe “Djajtë e Kuq”, mund të sigurojnë fondet e nevojshme për transferimin e tij. Pavarësisht kësaj, burime të ESPN bëjnë me dije se Eduardo Camavinga preferon një lëvizje drejt La Ligas ose PSG.