Arsenal është shumë afër arritjes së një marrëveshje për transferimin e yllit të Leicester, Youri Tielemans, në Emirates Stadium. Londinezët janë gati të ofrojnë 40 milionë paundë për shërbimet e mesfushorit belg, por mesa marrëveshja është ende larg finalizimit. Kjo pasi Real Madrid gjithashtu po monitoron Tielemans, dhe është gati të bëjë një lëvizje nëse Arsenal nuk ia del të kualifikohet në Champions League sezonin e ardhshëm.
Trajneri i Arsenal, Mikel Arteta kërkon të përforcojë mesfushën e tij në prag të sezonit të ri, dhe Tielemans duket alternativa perfekte për kërkesat e spanjollit. “Topçinjëve” u duhet patjetër një mesfushor, duke marrë parasysh faktin se e ardhmja e Granit Xhakës është e paqartë, ndërsa Mohamed Elneny i skadon kontrata në fund të sezonit.
Tielemans nga ana e tij ka refuzuar propozimet për një kontratë të re nga ana e klubit dhe është gati të pranojë oferta nga ekipet e tjera. “Dhelprat” gjithashtu duket se kanë pranuar realitetin se herët apo vonë do të humbasin mesfushorin, dhe tashmë duan të përfitojnë sa më shumë nga shitja e kartonit të tij.
Përveç Real Madrid dhe Arsenal, Manchester United gjithashtu ka shfaqur interes për Tielemans, por shanset e “Djajëve të Kuq” për të sjellë belgun në Old Trafford janë tashmë shumë të vogla. Kjo duke marrë parasysh faktin se United jo vetëm që nuk do të luajë në Champions League sezonin e ardhshëm, por rrezikon të humbasë dhe mundësinë për të luajtur në Europa League.
Tielemans është aktivizuar më parë me Anderlecht dhe Monaco. Futbollisti nuk e ka fshehur asnjëherë dëshirën e tij për të luajtur në Champions League, dhe ky pritet të jetë faktori kryesor në përcaktimin e destinacionit të tij të rradhës. Për momentin, është Arsenali i Mikel Artetës që kryeson garën.
