Raphinha do t’i bashkohet më në fund Barcelonës. Sulmuesi i Leeds do të bëhet pjesë e katalanasve për shifrën e 65 milionë paundëve. Ishin drejtuesit e klubit spanjollë që u dorëzuan dhe pranuan kushtet e anglezëve. Katalanasit fillimisht menduan se mund të siguronin kartonin e brazilianit për vetëm 25 milionë paundë.
Kjo ishte vlera e klauzolës për prishjen e kontratës në rast se Leeds do të binte nga kategoria. Por ekipi anglez ia doli të siguronte mbijetesën në ditën e fundit të Premier League. Kjo bëri që drejtuesit të mos tërhiqeshin nga kërkesa prej 60 milionë paundësh për kartonin e Raphinha. Për më shumë, Chelsea ishte gati të ofronte këtë shifër plus 5 milionë paundë të tjera në formën e bonusit. Kjo bëri që Barcelona të pranonte përfundimisht kërkesën e Leeds, dhe marrëveshja do të zyrtarizohet shumë shpejt.
Vet lojtari e ka bërë disa herë të qartë se spanjollët ishin destinacioni i tij i preferuar. Për më shumë, agjenti i tij, Deco, pati arritur akordin me Barcelonën, që verën e kaluar, përsa i përket temrave personalë të kontratës. Megjithatë, katalanasit duhet të sigurojnë sa më shpejt fondet e duhura për të përmbyllur transferimin.
Opsioni më i mundshëm është shitja e kartonit të Frenkie de Jong. Manchester United është klubi kryesor që kërkon kartonin e hollandezit, dhe mendohet se “Djajtë e Kuq” janë të gatshëm të paguajnë një shumë fillestare prej 56 milionë paundësh për mesfushorin. Problemi kryesor që mund të vonojë këtë lëvizje, është fakti se Barcelona i ka borxh 17 milionë paundë në paga të papaguara lojtarit. Megjithatë, transferimi pritet të realizohet herët apo vonë, duke marrë parasysh dhe rolin bindës që trajneri i United, Erik ten Hag, mund të ketë për të joshur De Jong drejt një lëvizje në Old Trafford.