Sipas raportimeve në Spanjë, Barcelona ka arritur një marrëveshje me Arsenal, për transferimin e Pierre-Emerick Aubameyang. Nënshkrimi me një sulmues ka qënë dëshira kryesore e trajnerit Xavi këtë merkato janari, dhe duke parë se Juventus nuk ka ndërmend të lëshojë Alvaro Moratan, katalanasit kanë hedhur sytë nga një tjetër objektiv.
Momentalisht sulmuesi është lënë në hije nga trajneri i Arsenal, Mikel Arteta, pas shkeljes së kodit disiplinor të klubit. Për më shumë, Aubameyang humbi dhe shiritin e kapitenit. Por kjo situatë po vazhdon tashmë prej më shumë se 1 muaji dhe duket se tekniku spanjoll mund të ketë hequr dorë përfundimisht nga sulmuesi, dhe nuk e sheh më atë në planet e së ardhmes. Kjo teori forcohet dhe më shumë nga fakti se Aubameyang nuk u thirr në sesionin e trajnimit që skuadra po zhvillon në Dubai.
Sipas gazetarit Gerard Romero, Barcelona ka arritur një marrëveshje në formë huazimi, për të mbajtur sulmuesin në Camp Nou deri në fund të sezonit. Por kjo lëvizje do të varet nga fati i Ousmane Dembele. Vetëm nëse Barcelona ia del të largojë këtë të fundit përpara mbylljes së merkatos, Aubameyang mund të zbarkojë në Spanjë. Kuptohet se kufizimi është për arsye financiare, dhe këtu nuk bëhet fjalë vetëm për pamundësitë e klubit spanjoll. Arsenal ka kërkuar që pagat e futbollistit të paguhen plotësisht nga katalanasit, gjë që e bën delikate marrëveshjen.
Dembele është një mik i ngushtë i Aubameyang, pasi dyshja ka luajtur së bashku tek Borussia Dortmund. Francezit i skadon kontrata në fund të sezonit, por Barcelona ka deklaruar publikisht nëpërmjet dejtorit sportiv, Mateu Alemany, se planifikon të shesë sulmuesin përpara mbylljes së merkatos. Por duke qënë se na ndajnë vetëm disa orë nga kjo gjë, është e vështirë të mendohet një surprizë e minutave të fundit.
