Barcelona preferon të sigurojë në mënyrë përfundimtare shërbimet e Adama Traore, sulmuesit që luan momentalisht si i huazuar në Camp Nou nga skuadra e Wolves. Spanjollët duan të arrijnë akordin në merkaton e verës, dhe janë të gatshëm të përfshijnë dhe Riqui Puig në një marrëveshje të mundshme.
Adama Traore ka spikatur me paraqitjet e tij me Barcelonën, që prej afrimit në skuadër gjatë merkatos së janarit. Lojtari ka regjistruar 4 asiste në 8 ndeshje në të gjitha kompeticionet. Kujtojmë se Traore është produkt i akademisë së Barcelonës, dhe klubi kërkon të firmosë përsëri me sulmuesin.
Sipas gazetarit Fabrizio Romano, katalanasit duhet të paguajnë rreth 30 milionë euro për kartonin e Traore. Megjithëse drejtuesit e klubit janë mjaft të kënaqur me paraqitjet e lojtarit, ata përsëri do të negociojnë me Wolves për të rënë dakord për një shifër më të ulët për transferimin e tij.
Një zgjidhje potenciale është përfshirja në marrëveshje e mesfushorit Puig. Ky i fundit është aktivizuar vetëm 13 herë gjatë këtij sezoni dhe pavarësisht talentit që zotëron, hapësirat për të në ekipin e trajnerit Xavi duken të vogla. Për më shumë, emri i tij është përmendur vazhdimisht për një largim të mundshëm nga Camp Nou, drejt Premier League. Wolves është një opsion interesant për Puig. Konkurrenca nuk është e lartë si në klubet “big” të kampionatit anglez, dhe lojtari ka më shumë mundësi të zhvillohet. Sidomos duke pare modelin e lojës së Wolves, që parapëlqen të luajë me 3 mesfushorë.
Presidenti i Barcelonës, Joan Laporta, nuk e ka fshehur dëshirën e tij për të firmosur me Traore, por gjithashtu është treguar i sinqertë për situatën e vështirë financiare të klubit. Ai tha:
“Adama ka AND-në e Barcelonës, ai është një nga sulmuesit më të mirë në botë. Do të donim shumë që ai të qëndronte këtu nëse është e mundur, por jemi në një situatë të vështirë ekonomike. Do të shohim në fund të sezonit.”