Drejtuesit e Barcelonës vazhdojnë të monitorojnë tregun për lojtarë të cilëve u skadon kontrata në fund të sezonit. Katalanasit kanë arritur të sigurojnë kartonin e Andreas Christensen dhe Franck Kessié në këtë mënyrë, por mesa duket nuk kanë ndërmend të ndalen këtu. Një tjetër emër mjaft i përfolur që përmbush këtë kusht është dhe ai i mbrojtësit të Chelsea, Antonio Rudiger.
Kërkesat financiare të këtij të fundit konsiderohen të larta nga Barcelona, por drejtuesit e klubit nuk kanë ndërmend të dorëzohen. Rudiger kërkon 7 milionë euro neto në sezon, plus bonus për nënshkrimin e kontratës së re. Megjithatë, spanjollët do të takohen përsëri me agjentin e mbrojtësit për të diskutuar mbi një marrëveshje të mundshme.
Trajneri Xavi Hernández pëlqen shumë aftësitë fizike dhe teknike të Rudiger, por ende nuk dihet se sa e gatshme do jetë Barcelona të sakrifikojë për të sjellë në Camp Nou mbrojtësin. Për më shumë, katalanasit kanë në dispozicion uruguajanin Araujo, i cili mbulon të njejtin pozicion me Rudiger. Problemet e Chelsea e bëjnë gati të pamundur që ky i fundit të vazhdojë të jetë pjesë e ekipit të Tuchel. Pavarësisht kësaj, lojtari ende nuk ka gjetur një ofertë bindëse.
Orientimi i Rudiger nga Barcelona ka ardhur dhe si pasojë e interesit në rënie për kartonin e tij, nga klube të tjera. Mes tyre mund të përmendim Bayern Munich, Real Madrid dhe Juventus, të cilët të gjithë po ndjekin alternativa të tjera përsa i përket mbrojtjes.
Humbja shokuese 4-1 e Chelsea përballë Brentford nuk është pritur aspak mirë nga fansat e klubit dhe trajneri Tuchel. Megjithatë, golin e vetëm për blutë e shënoi në mënyrë të pazakontë pikërisht Rudiger. Mbrojtësi festoi golin dhe u shfaq mjaft i lumtur në fushë, por pavarësisht kësaj, dëshira e tij kryesore vazhdon të jetë një aventurë e re në Europë.