Barcelona ende nuk ka regjistruar afrimet e reja të merkatos së verës, në prag të ndeshjes hapëse të La Liga përballë Rayo Vallecano. Gjigandët spanjollë janë përballur me shumë sfida financiare këtë vit, dhe duket se ende nuk kanë arritur të grumbullojnë fondet e nevojshme, për të kënaqur kërkesat e bordit të La Liga.
Drejtuesit e Barcelonës kanë shitur të drejta televizive dhe aksione të klubit në përpjekje për të grumbulluar më shumë fonde. Krahas kësaj, veteran Gerard Pique ka pranuar një ulje page për të suportuar klubin. Robert Lewandowski dhe Raphinha janë 2 prej lojtarëve të cilët ende nuk janë regjistruar zyrtarisht si futbollistë të Barcelonës. Nëse kjo nuk ndodh së shpejti, gjermani dhe braziliani nuk mund të aktivizohen në La Liga.
Katalanasit gjithashtu po mundohen të shesin shërbimet e Samuel Umtiti dhe sulmuesit Martin Braithwaite. Këta të dy e kanë humbur vendin e titullarit në ekip, teksa me afrimet e verës, gjasat për të luajtur në sezonin e ri janë shumë të pakëta. Kjo gjë është konfirmuar dhe nga presidenti i klubit, Joan Laporta, i cili deklaroi së fundmi:
“Ata (Umtiti dhe Braithwaite) e kanë kuptuar se gjëja më e mirë për t’u bërë është të luajnë për një ekip tjetër. Kontratat e tyre janë respektuar gjithmonë, por koha ka ardhur që ata të bëjnë një hap përpara. Këtë javë duhet zgjidhur situata e të dyve.”
Ndërkohë situata e Frenkie de Jong është gjithashtu shumë delikate, teksa shitja e kartonit të hollandezit mund të nxjerrë përfundimisht Barcelonën nga situata e vështirë. Megjithatë, Laporta ka këmbëngulur se klubi dëshiron që De Jong të qëndrojë në Camp Nou, pavarësisht raportimeve të mediave. Në këtë situatë, është ende e paqartë se si Barcelona do të jetë në gjendje të regjistrojë lojtarët e rinj, para startit të sezonit.
