Barcelona është e interesuar për shërbimet e sulmuesit të Arsenal, Pierre-Emerick Aubameyang. Sipas raportimeve të Sky Sports, katalanasit kanë shprehur gatishmërinë për të përfshirë dhe brazilianin Philippe Coutinho, si pjesë e një marrëveshjeje të mundshme. Vitin e kaluar Aubameyang nënshkroi një kontratë të re me “topçinjtë”, e cila është e vlefshme deri në vitin 2024. Megjithatë, një ofertë e mirë nga spanjollët mund të ndryshojë gjithçka dhe shumë shpejt sulmuesi mund të mbajë veshur fanellën e “blaugranave”.
Ndërkohë në Londër, lajmeve për largimin e Granit Xhakës nga Arsenal duket se u ka ardhur fundi. 28 vjeçari ka rënë dakord për të rinovuar deri në vitin 2024 me “topçinjtë”. Italianët e Romës ishin të interesuar për kartonin e futbollistit me origjinë shqiptare, por nuk ishin në gjendje t’i ofronin Arsenal një ofertë financiare në nivelin e dëshiruar nga anglezët. Kjo gjë i hapi rrugë qëndrimit të Xhakës në Londër, i cili ka kaluar një karrierë me ulje-ngritje te Arsenal.
Këta të fundit do të kërkojnë të kompletojnë transferimin e Martin Ødegaard nga Real Madrid, përpara mbylljes së merkatos verore. Londinezët e dinë se hapësirat e talentit norvegjez në klubin spanjoll janë të kufizuara, dhe do të mundohen të marrin shërbimet e sulmuesit për shifrën e 34 milionë eurove.
Arteta gjithashtu është në kërkim të një portieri, me Neton e Barcelonës i identifikuar si një nga alternativat kryesore. Nevoja për një “gardian” në portë u riforuca dhe më shumë, pas humbjes surprizë që “The Gunners” pësuan përballë Brentford në shifrat 2-0.
Zhvillime interesante vijnë dhe nga ekipi i Chelsea. Trajneri Thomas Tuchel i ka sytë tek Emerson Palmieri i Lyon. Mësohet se 2 klubet janë në bisedime të avancuara për arritjen e një akordi financiar. Ndërkohë Blutë e Londrës po konsiderojnë dhe shitjen e Ross Barkley, Danny Drinkwater, si dhe Tiemoue Bakayoko, për të rregulluar financat e brendshme pas shpenzimeve për afrimin e Lukaku nga Inter.
