Objektivi numër 1 i Barcelonës në merkaton verore, është sulmuesi spanjoll i Manchester City, Ferran Torres. Ky është raportimi që vjen nga prestigjozja “Sport.es”, e cila ka zbuluar dëshirën e trajnerit Xavi Hernandez. Ky i fundit kërkon një lojtar që do të ketë impakt të menjëhershëm tek loja e Barcelonës. Katalanasit janë në një krizë të vërtetë rezultatesh, teksa mbajnë vendin e 8 në kampionat, dhe janë tashmë jashtë Champions League.
Ferran Torres mbërriti në Angli nga Valencia, për shifrën e 25 milionë eurove. Barcelona e shikon spanjollin si zëvëndësuesin perfekt për Sergio Agüero, dhe sipas raportimeve, trajneri Xavi nuk dëshiron që të konsiderojë opsionet e tjera që i janë ofruar. Problemi kryesor që pritet të hasin katalanasit është shifra që “qytetarët” kërkojnë për kartonin e Torres.
City kërkon rreth 50 milionë euro për sulmuesin, dhe Pep Guardiola nuk ka ndërmend të bëjë negocioata përsa i përket shumës. Por gjithsesi, anglezët janë të prirur të diskutojnë për formën e transferimit dhe kohën e tij. Kjo do të thotë se Barcelona mund të përfshijë një nga futbollistët e vet në marrëveshje, në qoftë se vërtet dëshiron të përfitojë shërbimet e talentit të City.
Një tjetër problem potencial me të cilin mund të përballet klubi spanjoll, është paga e lojtarit. Barcelona ndodhet në limitet e respektimit të rregullave të “fair play-it” financiar. Kjo do të thotë se afrimi i Torres sipas të gjitha gjasave nënkupton largimin e Coutinho ose një lojtari tjetër, për të lehtësuar financat e klubit.
Ndërkohë Manchester United është gjithashtu i interesuar në shërbimet e Ferran Torres. Por City është mjaft skeptik për t’i ofruar lojtarin, rivalëve të tyre historikë. Ekipi i drejtuar nga Ralf Rangnick ka më shumë mundësi ekonomike sesa Barcelona në këto momente, por në garën për nënshkrimin me Torres, spanjollët i favorizon rivaliteti mes 2 ekipeve angleze.