Megjithëse Xavi Hernandez është prej kohësh në kërkim të përforcimeve në sulm, tekniku i Barcelonës e di mjaft mirë se mbrojtja e blaugranave, gjithashtu ka nevojë për rinovim. Për këtë arsye, bosi i katalanasve i ka vënë syrin një prej mbrojtësve më të mirë në kampionatin gjerman. Bëhet fjalë për Thomas Meunier të Borussia Dortmund.
Barcelona është tashmë në kontakt me përfaqësues të klubit gjerman, për një marrëveshje të mundshme, përpara mbylljes së merkatos së janarit. Dortmund është i hapur për të pranuar një ofertë të kënaqshme, ndërsa mbrojtësit gjithashtu i pëlqen të luajë në Camp Nou. Por sipas raportimeve, spanjollët preferojnë një lëvizje në formë huazimi. Kjo pasi ata janë ende të paqartë për situatën e Ousmane Dembele, dhe nga kjo varen dhe planet e tjera të merkatos.
Duke marrë shkas nga situata e vështirë financiare, drejtuesit katalanas nuk mund të bëjnë shpenzime të pamenduara. Nëse Dembele rinovon duke pranuar një page më të ulët, apo largohet nga klubi, atëherë Barcelona është më e sigurt për përmbushjen e objektivave të saj. Kandidatë të tjerë për t’u larguar nga ekipi i Xavit janë dhe Oscar Mingueza me Sergino Dest. Mingueza ka tërhequr interesin e Valencia dhe Bordeaux, ndërsa Dest duket se nuk është më në planet e Xavi.
Meunier mund të rezultojë ajo çka i ka munguar prej kohësh Barcelonës në mbrojtje. Eksperienca e lojtarit është e rëndësishme, teksa belgu ka luajtur rregullisht në Champions League, fillimisht me PSG, dhe më pas me Dortmund. Për më shumë, lojtari është mjaft shtatlartë (1.91m) dhe blaugranat mund ta përdorin këtë avantazh në goditjet e këndit dhe ato të dënimit.
Paralelisht, Barcelona gjithashtu po punon për afrimin e lojtarit të Ajax, Nicolas Tagliafico. Ekipet kanë hyrë në negociata, por ende nuk ka një marrëveshje konkrete mes tyre.
