Gjigandët spanjollë të Barcelonës janë duke kërkuar intensivisht për një sulmues, në mënyrë që të përforcojnë ekipin e tyre këtë merkato dimri. Skuadrës së drejtuar nga Xavi Hernandez, i mungon prej kohësh një sulmues tipik, i konsoliduar si titullar në 11-shen e parë. Për këtë arsye, po konsiderojnë një sërë opsionesh. Njëri prej tyre është dhe Pierre-Emerick Aubameyang i Arsenal.
Klubi spanjoll është duke monitoruar me vëmendje situatën e sulmuesit tek klubi londinez, pasi zhvillimet e fundit mund të ndihmojë Barcelonën në transferimin e lojtarit në Camp Nou. Arsenal i hoqi Pierre-Emerick Aubameyang shiritin e kapitenit, për shak të një shkeljeje disiplinore. Arsyeja ishte një udhëtim që sulmuesi ka bërë drejt Francës, për të vizituar mamanë e tij. Aubameyang dështoi të kthehej në Angli brenda afatit kohor të caktuar, duke shkaktuar kështu një “konflikt” mes tij dhe klubit.
32 vjeçari nga Gaboni nuk ishte pjesë e ekipit, në fitoren e fundjavës përballë Southampton në fundjavë, ndërkohë që trajneri Mikel Arteta ka refuzuar të komentojë situatën në detaje. Duke u nisur nga kjo situatë, Barcelona mendon se ka shanse reale për të përfituar shërbimet e futbollistit gjatë merkatos së janarit. I vetmi problem për spanjollët është aspekti financiar i operacionit.
Aubameyang paguhet rreth 250 mijë paundë në javë tek londinezët, dhe kjo shifër është mjaft e lartë për katalanasit, duke marrë parasysh gjendjen e tyre financiare në këto momente. Gjithsesi, presidenti Laporta e ka një strategji në mendje.
Klubi i La Liga po mendon t’i ofrojë Arsenal mundësinë e një shkëmbimi që përfshin Ousmane Dembele. Kontrata e këtij të fundit me Barcelonën mbaron në verën e vitit të ardhshëm, dhe spanjollët mund të përfitojnë disa të ardhura shtesë financiare nëse shkëmbimi mes Auba dhe Dembele bëhet realitet.
Në rast se skenari Aubameyang dështon totalisht, katalanasit i kanë sytë tek Manchester United, me sulmuesin Cavani drejt largimit nga anglezët.
