Drejtuesit e Barcelonës kanë tashmë një plan rezervë nëse nuk arrijnë të sjellin Robert Lewandowski në Camp Nou këtë verë. Katalanasit kanë identifikuar Romelu Lukaku dhe Sadio Mane, si dy alternativa të tjera të përshtatshme për objektivat e skuadrës.
Lewandowski shënoi 50 gola në 46 ndeshje me Bayern Munich, gjatë sezonit që lamë pas. Polaku ka shënuar gjithsej 344 gola në 375 paraqitje përgjatë 8 viteve të qëndrimit të tij tek kampionët gjermanë. Por pavarësisht rekordeve të jashtëzakonshme, Lewandowski konfirmoi se do të largohet nga Bayern në fund të sezonit, dhe është në kërkim të aventurës së rradhës.
Lukaku nga ana tjetër është gjithashtu mjaft i prirur të largohet nga klubi i tij aktual. Sulmuesi kaloi një sezon mjaft të vështirë në Premier League, duke shënuar vetëm 8 gola pas një transferimi me mjaft bujë në Angli. Belgu do të preferonte më shumë një rikthim tek Inter në Serie A, por italianët nuk kanë shfaqur deri tani ndonjë gatishmëri për ta bërë të mundur këtë lëvizje. Barcelona mbetet një opsion mjaft interesant nëse kjo nuk ndodh.
Mane nga ana tjetër ka pranuar parimisht një marrëveshje me Bayern Munich, por mbetet për t’u parë nëse do të arrihet në një akord mes palëve. Ish-sulmuesi i famshëm i Premier League, Chris Sutton është i idesë se Liverpool nuk duhet ta lërë një talent si Mane të largohet. Sutton dha opinionin e tij për BBC Radio 5:
“Nëse je në pozitat e Liverpool nuk duhet ta shesësh atë (Mane) për asnjë lloj shifre…Nuk po them se ai është i pazëvëndësueshëm, pasi rekrutimi i Klopp ka qënë i jashtëzakonshëm. Por niveli i konsistencës së Liverpool është për shkak të asaj vije sulmuese… Nuk më vjen në mendje një lojtar tjetër që është integruar aq shpejt dhe ka bërë atë që ka realizuar Mane.”