Barcelona është ende në bisedime me Chelsea për kartonin e Marcos Alonso. Sipas prestigjozes 90min, katalanasit janë afër finalizimit të marrëveshjes për mbrojtësin e majtë, teksa ky i fundit e ka bërë të qartë dëshirën e tij për t’u larguar nga Stamford Bridge.
Gjigandët katalanas kanë mbajtur Alonso nën vëzhgim gjatë gjithë verës, së bashku me mbrojtësin tjetër të Chelsea, Cesar Azpilicueta. Megjithatë, ky i fundit i dha fund spekullimeve mbi të ardhmen e tij, duke firmosur një një kontratë të re 2 vjeçare me Chelsea.
Alonso ndërkohë dëshiron t’i bashkohet Barcelonës, sidomos pas humbjes së shiritit të kapitenit tek Chelsea. Mesohet se Barcelona dhe lojtari kanë gjetur akordin për termat personalë të kontratës, dhe tani gjithçka që mbetet për t’u diskutuar është shuma që spanjollët duhet t’i paguajnë londinezëve.
Në këtë pikë, Chelsea-it i intereson të grumbullojë fonde, duke qënë se sapo ka zyrtarizuar marrëveshjen me Brighton për shërbimet e Marc Cucurella. Blutë e Londrës do të duhet t’i paguajnë Brighton plot 55 milionë paundë për kartonin e 24 vjeçarit. Ardhja e Cucurella në Stamford Bridge është një tjetër lajm pozitiv për trajnerin Tuchel, i cili tashmë ka më shumë siguri nëse Alonso largohet nga klubi.
Trajneri gjerman ndërkohë ka konfirmuar se lojtari spanjoll kërkon një transferim drejt Barcelonës. Pas fitores 1-0 ndaj Everton, në ndeshjen e parë të Chelsea për këtë sezon të ri, Tuchel u pyet për mungesën e Alonso në fushë. Kur u pyet nëse mbrojtësi është drejt largimit gjermani u përgjigj:
“Po, kjo është situata. Ai po përpiqet të largohet dhe ne kemi pranuar dëshirën e tij. Prandaj nuk do të bënte sens nëse do të ishte në fushë sot. Në një skenar tjetër ai do të ishte në fushë, por në këtë situatë, ishte gjëja e duhur për t’u bërë.”