Spanjollët e Barcelonës janë të hapur ndaj ofertave potenciale, për mbrojtësin amerikan Sergino Dest. Katalanasit mund të heqin dorë nga shërbimet e lojtarit, që në merkaton e janarit, pasi kërkojnë të mbledhin fonde, për të përforcuar sulmin. Për ta bërë këtë, Barcelona është tashmë e gatshme të sakrifikojë lojtarë që më përpara mund të konsiderohesin “të paprekshëm” në kampin blaugrana.
Dest, 21 vjeç, është një prej tyre, dhe burime të ESPN bëjnë me dije se Bayern Munich është një nga klubet e interesuara për mbrojtësin. Barça nënshkroi me Dest nga Ajax, për shifrën e 20 milionë eurove në vitin 2020, duke mposhtur Bayern, që gjithashtu kërkonte lojtarin. Klubi gjerman ka mbetur në kontakt me Dest që prej atij momenti, dhe kërkoi një lëvizje huazimi në fillim të këtij viti, me opsionin për të blerë kartonin e mbrojtësit verën e ardhshme, për rreth 25 milionë euro.
Ndërkohë, Barça këtë sezon firmosi dhe me 38-vjeçarin Dani Alves, duke rritur konkurrencën në krahun e djathtë të mbrojtjes. ESPN gjithashtu zbuloi, se klubi katalanas dëshiron të nënshkruajë me Cesar Azpilicueta, kur kontrata e tij me Chelsea të skadojë në vitin 2022. Kjo do të thotë se ekipi spanjoll nuk do të ngelet pa opsione, edhe nëse vendos të shesë kartonin e Dest në janar.
Drejtori i futbollit të Barçës, Mateu Alemany, konfirmoi të martën se duhet të ketë largime përpara se të nënshkruajnë muajin e ardhshëm, me sulmuesin e Manchester City, Ferran Torres, transferim ky që është bërë tashmë zyrtar. Klubi spanjoll po operon me një buxhet shpenzimesh prej 97 milion € këtë sezon. Kjo do të thotë se sipas rregullores së La Liga, Barcelonës do t’i lejohet të shpenzojë vetëm 25% të çdo kursimi që ata bëjnë në të ardhmen e afërt, një shifër kjo e vogël për një klub që pretendon të konkurrojë me më të mirët e Europës.