Sipas raportimeve më të fundit të L’Equipe në Francë, Lionel Messi shumë shpejt do të prezantohet si lojtar i PSG, në një ceremoni speciale në kullën Eiffel. Por Barcelona, mesa duket do të mundohet deri në fund që të mos humbasë superstarin e vet. Sipas Marca, spanjollët po përpunojnë një ankesë pranë Komisionit Europian.
Pretendimi i katalanasve është se klubi francez po shkel rregullat financiare të merkatos me transferimin e argjentinasit në Paris. Gjithsesi, edhe nëse ankesa merret parasysh nga autoriteti, që ka shumë pak shanse, për Barcelonën është përsëri shumë e vështirë që të përpunojnë një kontratë për të mbajtur yllin e tyre në Camp Nou.
Ndërkohë në Itali, Jose Mourinho i ka hedhur syte tek Mauro Icardi i PSG. Trajneri i Romës po kërkon një sulmues që i përshtatet modelit të ri të lojës që kërkon të ngrejë te ekipi italian. Transferimi i një sulmuesi mund të kthehet në një domosdoshmëri për teknikun, pasi emri i Edin Dzeko po përflitet gjithnjë e më shumë për një largim të mundshëm drejt Inter.
Në Londër, Arsenal është gati të bëjë një ofertë për mbrojësin e Atletico Madrid, Kieran Trippier. Ishte ekipi i Manchester United që u interesua fillimisht për lojtarin, por “Djajtë e Kuq” nuk ishin në gjendje të binin dakord mbi aspektin financiar të lëvizjes. Këta të fundit janë të gatshëm të shesin francezin Anthony Martial për shifrën e 50 milionë paundëve. Ndër ekipet më të interesuara për të afruar futbollistin është Inter, që po kërkon të zëvëndësojë Romelu Lukakun, i cili është shumë pranë transferimit te Chelsea.
Ndërsa në Gjermani, drejtori sportiv i Bayern Munich, Hasan Salihamidzic, ka konfirmuar interesin e gjermanëve për 21 vjeçarin e Dortmund, Erling Haaland. Gjithsesi, ky duket një objektiv i vështirë për bavarezët në këtë moment.
