Pasi Niklas Sule refuzoi zyrtarisht një ofertë për rinovim kontrate, gjermanët e Bayern janë në kërkim të një zëvëndësuesi potencial. Mediat e famshme GOAL dhe Spox, kanë konfirmuar të dyja se lojtari do të largohet nga klubi në verë, pasi kontrata e tij skadon në fund të sezonit. Kjo, pavarësisht faktit se drejtuesit e Bayern ofruan t’i rrisnin pagën e tij vjetore në 10 milionë euro.
Ndërkohë një nga emrat më të përfolur të orëve të fundit, për të zënë vendin e tij, është Christensen i Chelsea. Lojtarit gjithashtu i skadon kontrata në fund të sezonit, dhe Bayern shpreson që të përfitojë shërbimet e lojtarit me kosto zero. Trajneri i bluve të Londrës, Thomas Tuchel, ka shtyrë mbrojtësin danez që të bëjë të qartë planet e tij mbi të ardhmen.
Tuchel tha për reporterët:
“Kemi kohë tashmë që presim për një konfirmim. Tani i takon Andreas të sillet ashtu si sillet në fushë, dhe jashtë saj. Ai thotë se e do Chelsea, dëshiron të qëndrojë këtu dhe të bëhet një pjesë e rëndësishme e klubit. Unë mendoj që ai është perfekt për ne dhe koha e tij këtu ende nuk ka mbaruar.”
Ndërsa përsa i përket Sule, lojtari ka kapur interesin e Newcastle dhe madje vet Chelsea. Por kuptohet se lojtarit nuk i intereson një lëvizje në asnjë prej këtyre ekipeve. Barcelona gjithashtu po monitoron situatën e futbollistit, teksa po kërkon përforcime në mbrojtje, një repart që u ka shkaktuar shumë probleme katalanasve këtë sezon.
Presidenti i Bayern, Herbert Hainer, u shpreh:
“I bëmë Niklas një ofertë. Tani është në dorën e tij ta pranojë atë ose jo. Kuptohet, kjo duhet të ndodhë brenda një afati të caktuar kohor, pasi ne duhet të pozicionohemi në bazë të qëndrimit të tij.”
