Gazetari sportiv Fabrizio Romano, ka bërë të ditur një lajm mjaft të bujshëm gjatë orëve të fundit. Ajo çfarë ishte përfolur është e vërtetë. Sadio Mane ka vendosur të largohet nga Liverpool dhe Bayern Munich është klubi që kryeson garën për të përfituar kartonin e senegalezit.
Pas humbjes në finalen e Champions League ndaj Real Madrid, Mane dha një mesazh për fansat që i përngjante shumë një fjale lamtumire. Pavarësisht faktit se Liverpool humbi garën në kampionat dhe në Champions League këtë sezon, “The Reds” janë paraqitur mjaft denjësisht këtë vit, dhe sidomos Mane. Sulmuesi triumfoi jo vetëm në FA Cup dhe Carabao Cup, por dhe me kombëtaren e Senegalit në kupën e Afrikës. Kujtojmë se Mane iu bashkua Liverpool nga skuadra e Southampton në vitin 2016.
Megjithëse Bayern është ekipi favorit për të qënë destinacioni i rradhës për afrikanin, asgjë nuk është e sigurt. Real Madrid gjithashtu është përfolur si një nga klubet e interesuara për asin e Liverpool. Spanjollët u zhgënjyen shumë nga lajmi se Kylian Mbappe rinovoi edhe për 3 vite me PSG, por tani duhet të kalojnë zhgënjimin dhe të mendojnë për një tjetër alternativë. Mane është një opsion që duket mjaft i përshtatshëm për situatën ku ndodhen Los Blancos, sidomos duke marrë parasysh se sulmuesi ka provuar aftësitë e tij në Premier League.
Një tjetër alternativë është dhe Robert Lewandowski. Por ky i fundit është përfolur më shumë për një transferim drejt Barcelonës. Gjithashtu, Real Madrid është në kërkim të talenteve të reja, duke qënë se nuk i mungon eksperienca e veteranëve, në gati çdo repart të ekipit aktual.
Mbetet të shohim nëse Bayern Munich dhe Liverpool do të gjejnë akordin për kartonin e Sadio Mane, por nëse kjo ndodh, Robert Lewandowski sipas të gjitha gjasave do të largohet nga gjigandët bavarezë.
