Bayern Munich sipas të gjitha gjasave nuk do të firmosë përfundimisht me Joao Cancelo në fund të sezonit. Mbrojtësi portugez aktivizohet momentalisht si i huazuar tek gjigandët gjermanë nga Manchester City. Kontrata e huazimit parashikon mundësinë e blerjes të kartonit nga ana e Bayern në fund të sezonit, por duket se bavarezët nuk do ta aktivizojnë këtë klauzolë.
Cancelo e startoi mjaft mirë aventurën e tij tek Bayern, me 2 asiste në 2 takimet e para, por më pas situata ndryshoi, dhe jo në favorin e mbrojtësit. Lojtari është lënë në stol në ndeshjet e fundit, përfshirë këtu dhe sfidën ndaj PSG në Champions League. Cancelo u aktivizua vetëm në minutat e fundit të ndeshjes si zëvëndësues.
Sipas prestigjozes Calciomercato, trajneri i Bayern, Julian Nagelsmann, nuk është tërësisht i lumtur me mënyrën sesi Cancelo ka zbatuar udhëzimet e tij në fushën e blertë, dhe kjo mendohet të jetë arsyeja kryesore se përse mbrojtësi nuk është aktivizuar si titullar.
Në bazë të raportimeve të fundit, nëse Joao nuk firmos me Bayern në verë, 2 opsionet kryesore për të ardhmen e tij janë Real Madrid dhe Chelsea. Rikthimi tek City ka pak gjasa të ndodhë teksa trajneri Guardiola e ka bërë të qartë me anë të vendimeve të tij se portugezi është një lojtar i zëvëndësueshëm.
Në momentin që huazimi i Cancelo u zyrtarizua, Guardiola u shpreh:
“Ai (Joao) u largua sepse kërkon të luajë të gjitha ndeshjet. Shpresoj që ta realizojë këtë në Gjermani për 4 muajt e ardhshëm dhe më pas nuk e di se çfarë do të ndodhë sezonin e ardhshëm.”
Mbrojtësi i talentuar ka ende kohë të përmirësojë pozitat e tij tek Bayern, por në të njejtën kohë duhet të mendojë për të ardhmen, pasi një transferim përfundimtar në Gjermani ka pak gjasa të ndodhë duke marrë parasysh dhe vlerën e kartonit të tij prej 62 milionë paundësh.
