Gleison Bremer i Torino është objektivi më i ri, i disa klubeve “big” në Premier League, përfshirë këtu Chelsea, Tottenham dhe Arsenal. Drejtori sportiv i klubit italian, Davide Vagnati do të udhëtojë shumë shpejt drejt Londrës, për të biseduar mbi një transferim të mundshëm të mbrojtësit në Premier League.
Braziliani fitoi çmimin si mbrojtësi më i mirë i Serie A për sezonin 2021-2022. Pavarësisht kombësisë braziliane, lojtari pritet t’i bashkohet përfaqësueses italiane të futbollit. Torino ndërkohë ka kuptuar se tani është momenti më i mirë për të shitur kartonin e Bremer. Presidenti i klubit, Urbano Cairo, pretendon të marrë të paktën 50 milionë euro për shërbimet e brazilianit.
Arsenal momentalisht është në bisedime me Lisandro Martinez të Ajax, ndërsa Tottenham është në bisedime me Clement Lenglet të Barcelonës. Përveç këtij të fundit, trajneri Conte ende nuk është dorëzuar nga objektivi i shumëkërkuar, Alessandro Bastoni i Inter. Chelsea ndërkohë po eksploron disa mundësi për të përforcuar mbrojtjen për sezonin e ardhshëm. Mes emrave në fjalë janë: Jules Kounde, Matthijs de Ligt dhe Kalidou Koulibaly. Gjithsesi Bremer mund të kthehet shumë shpejt në prioritet për blutë, duke qënë se opsionet e mësipërme janë më të komplikuara për t’u realizuar.
Në lidhje me lojtarin e Torino, pavarësisht interesimit mjaft të qartë nga Anglia, duket se klubi që është më afër tij është Inter. Zikaltërit duan të zëvëndësojnë Milan Skriniar ose Alessandro Bastonin, duke marrë parasysh se këta të dy kanë mjaft gjasa për t’u larguar drejt PSG apo Chelsea.
Gjithsesi, klubet angleze mbeten të favorizuara për të siguruar kartonin e Gleison Bremer për shkak të kostos së tij. Asnjë klub në Itali nuk është i gatshëm për momentin të plotësojë kërkesën e Torino, që pret të marrë 50 milionë euro për shërbimet e mbrojtësit.
