Sulmuesi i Manchester City, Raheem Sterling, është shumë pranë transferimit te londinezët e Chelsea. 27 vjeçari ka vetëm 1 vit të mbetur në kontratën e tij aktive me “qytetarët”, teksa për kartonin e tij janë interesuar vazhdimisht dhe shumë klube të tjera “big” në Angli dhe jo vetëm.
Nëse marrëveshja zyrtarizohet, Sterling do të jetë afrimi i parë madhor për Chelsea, që pas marrjes në pronësi të klubit nga Todd Boehly. Sipas burimeve të BBC, blutë e Londrës do të shpresojnë të konkretizojnë operacionin përpara startit të turit para-sezonal të ekipit në Amerikë. Në këtë mënyrë, Sterling mund t’i bashkohet ekipit të Thomas Tuchel dhe të shpenzojë më shumë kohë për t’u ambientuar.
Barcelona, Real Madrid dhe Bayern Munich ishin gjithashtu të interesuara për shërbimet e sulmuesit, por anglezi u tërhoq nga dëshira publike e shprehur nga ana e Chelsea, për kartonin e tij. Burime të brendshme bëjnë me dije se drejtuesit e City kërkonin që lojtari të mos largohej, por pavarësisht akordit paraprak me Chelsea, Sterling ende ruan raporte të mira me trajnerin Pep Guardiola dhe shokët e skuadrës. Kjo pasi City ka respektuar deri më tani dëshirat e lojtarit si dhe i ka dhënë gjithmonë atij lirinë për t’u shprehur mbi të ardhmen.
Sterling do të jetë një përforcim mjaft i rëndësishëm për Chelsea, që këtë vit nuk do të ketë në dispozicion Romelu Lukaku. Ky i fundit iu ribashkua Inter në formën e huazimit për sezonin e ri. Pavarësisht formës së dobët, sulmuesi belg ishte golashënuesi më i mirë për Chelsea sezonin e kaluar, me 15 gola në të gjitha kompeticionet. Kjo statistikë është tregues i qartë i nevojës për një sulmues në ekipin e Tuchel, duke qënë se as Kai Havertz dhe as Mason Mount nuk bindën plotësisht me paraqitjet e tyre sezonin që lamë pas.
