Chelsea është hedhur në sulm për mesfushorin e Barcelonës, Frenkie de Jong, dhe duket se situate është në favor të londinezëve. Hollandezi është përfolur prej kohësh për një largim nga Camp Nou këtë verë, por destinacioni i rradhës gjithmonë është menduar të jetë Manchester United.
Por pavarësisht kësaj, sipas prestigjozes Metro, lojtari preferon një transferim drejt Stamford Bridge. Manchester United ndërkohë ka rënë dakord me Barcelonën mbi shifrën e transferimit të De Jong që muajin e kaluar, teksa “Djajtë e Kuq” janë të gatshëm t’i paguajnë katalanasve 63 milionë paundë për kartonin e lojtarit. Megjithatë, drejtuesit e United kanë dështuar për të bindur De Jong që t’i bashkohet ekipit.
Mesfushori ka dhe një problem tjetër me largimin nga Barcelona, dhe bëhet fjalë për pagat e papaguara që spanjollët i detyrohen. Klubi duhet t’i paguajë De Jong rreth 17 milionë paundë në detyrime të prapambetura, dhe pavarësisht destinacionit të rradhës, hollandezi kërkon të zgjidhë fillimisht këtë problem.
Pavarësisht situatës së rëndë ekonomike, Barcelona ka shpenzuar rreth 140 milionë paundë këtë merkato vere, duke u munduar të krijojë një ekip më konkurrues në Spanjë dhe Europë, për sezonin e ri. Por tashmë, drejtuesit katalanas shpresojnë të shesin kartonin e De Jong për të siguruar fondet e duhura për të regjistruar kontratat me Robert Lewandowski dhe Raphinha. Burimet pranë De Jong thonë se lojtari ndihet sikur klubi po e detyron të largohet, dhe tashmë e ka pranuar faktin se aventura e tij në Camp Nou po vjen drejt fundit.
Marrëdhënia e lojtarit me ish-trajnerin e Ajax, Erik ten Hag mendohej të ishte një faktor i rëndësishëm përcaktues, që do të afronte më shumë De Jong drejt United. Por duket se ka ndodhur krejt e kundërta, teksa hollandezi ka vlerësuar më shumë projektin e Thomas Tuchel tek Chelsea.
