Londinezët e Chelsea janë të gatshëm të paguajnë 100 milionë paundë për të siguruar kartonin e Victor Osimhen. Bomberi i Napolit është një nga lojtarët më të kërkuar të momentit dhe konkurrenca për shërbimet e tij pritet të jetë mjaft e fortë gjatë merkatos së verës.
Chelsea është vetëm 1 nga ekipet që ka shprehur interesin e vet për Osimhen, teksa trajneri Graham Potter kërkon një sulmues tipik qendre. Italianët e Napoli e vlerësojnë kartonin e nigerianit në shifrat e 100 milionë paundëve, por presidenti De Laurentiis e di mjaft mirë se mund të përfitojë edhe më shumë, në rastin e një lufte financiare mes ekipeve europiane, për shërbimet e Osimhen.
Pavarësisht se Chelsea ka shprehur gatishmëri financiare, blutë e Londrës ka pak gjasa që të kualifikohen në Champions League sezonin e ardhshëm, gjë që mund t’i bëjë të vështira negociatat me lojtarin. Sidomos duke marrë parasysh interesin e Manchester United, Liverpool dhe Real Madrid.
Në rast se sulmuesi vendos t’i bashkohet Chelsea, sipas të gjitha gjasave ai do të sigurojë vendin e titullarit në formacion. Kjo dhe për shkak të faktit se e ardhmja e Pierre-Emerick Aubameyang në Stamford Bridge mbetet në dyshim. Drejtuesit e Chelsea po konsiderojnë ndërprerjen e kontratës së sulmuesit në fund të sezonit, duke marrë parasysh dhe kostot e larta financiare të saj. Aubameyang përfiton rreth 300 mijë paundë në javë tek blutë e Londrës.
Osimhen ndërkohë ka realizuar plot 25 gola në 29 ndeshje për Napolin këtë sezon, duke përfshirë këtu dhe 4 realizime në Champions League. Napoletanët sipas të gjitha gjasave do të shpallen kampionë në Serie A për këtë sezon, teksa kryesojnë kampionatin me plot 19 pikë diferencë nga vendi i dytë. Napoli gjithashtu ka shansin të triumfojë në Champions League, teksa do të përballet me Milan në çerekfinalet e kompeticionit prestigjoz.
