Burime nga gjermanja Bild, bëjnë me dije se Chelsea është në kontakte me agjentin e Robert Lewandowski, për një lëvizje të mundshme të tij në Stamford Bridge. Mësohet se objektivi kryesor i bluve është Erling Haaland i Dortmund, dhe në rast se kjo lëvizje dështon, atëherë londinezët do të përpiqen të sjellin bomberin e Bayern Munich në ishull.
Sipas raportimeve, bisedimet po zhvillohen mes anglezëve dhe agjentit Pini Zahavi. Chelsea po mendon të vijë me një ofertë prej 50 milionë paundësh për kartonin e Lewandowski, por Bayern nuk dëshiron të heqë dorë nga shërbimet e sulmuesit. Polaku ka dhe 2 vite në kontratë me gjermanët, dhe është pjesë e tyre që prej vitit 2014.
Ndërkohë nga krahu tjetër, Manchester United është një hap para Arsenal në garën për të marrë shërbimet e portugezit Ruben Neves. 34 vjeçari është momentalisht pjesë e Wolves në Premier League. Sipas lajmeve të fundit, “Djajtë e Kuq” kanë përgatitur një ofertë financiare prej 35 milionë paundësh për kartonin e futbollistit. Përveç Neves, United është ende në bisedime me Real Madrid, për kartonin e Raphael Varane.
Interesant është fakti se Real Madrid, ashtu dhe Manchester United, janë të interesuar për shërbimet e Goretzka të Bayern Munich. Anglezët i kanë ofruar 26 vjeçarit 200.000 paundë në javë për të nënshkruar me United, pasi përfundumit të kontratës me gjermanët, e cila skadon verën e ardhshme. Por Florentino Pérez nuk i pëlqen të ngelet prapa në këtë garë. Presidenti i Real Madrid e ka bërë tashmë traditë, transferimin e lojtarëve nga rivalët historikë gjermanë të Bayern Munich. Gjithsesi sipas Bild, nëse transferimi bëhet realitet, kjo gjë do të ndodhë vetëm në merkaton e ardhshme verore. Kjo për shkak të situatës ekonomike brenda klubit spanjoll. Ndërkohë vetëm para pak ditësh, Real Madrid prezantoi David Alaba, i cili iu bashkua ekipit me parametra zero nga Bayern Munich.
