Drejtuesit e Chelsea kanë kontaktuar Jose Mourinho, për të diskutuar një marrëveshje të mundshme për rolin e trajnerit të Chelsea. Pas shkakrimit të Graham Potter, blutë e Londrës kanë emëruar Frank Lampard, si trajnerin e ri të përkohshëm, deri në fund të sezonit. Megjithatë, presidenti Todd Boehly është në kërkim të një tekniku në planin afatgjatë, i cili pritet të marrë detyrën duke nisur nga sezoni i ardhshëm.
Jose Mourinho është një nga alternativat në listën e Chelsea, teksa sipas mediave angleze, trajneri i Romës ka patur një telefonatë me përfaqësues nga Stamford Bridge. Nëse portugezi emërohet përsëri trajner i klubit, kjo do të ishte aventura e tij e tretë tek blutë.
Fillimisht Mourinho u emërua trajner i Chelsea në vitin 2004, pasi surprizoi Europën duke fituar Champions League-ën me ekipin e Porto. Tekniku pati një periudhë mjaft të suksesshme dhe në Angli, teksa ia doli të fitonte 2 herë titullin kampion në Premier League, 2 FA Cup dhe 2 trofe të League Cup. Gjithsesi, portugezi u largua nga Stamford Bridge në vitin 2007, pas disa mosmarrëveshjeve me ish-presidentin e klubit, Roman Abramovich.
Pas një anveutre me Real Madrid, Mourinho u rikthye në Londër në vitin 2014, dhe udhëhoqi Chelsea drejt suksesit në Premier League. Megjithatë, aventura e tij e dytë tek blutë e Londrës u ndërpre në vitin 2015, pas një ecurie negative prej 9 humbjesh në 15 takime në kampionat.
Mbetet të shohim nëse teknikut portugez do t’i jepet një tjetër mundësi për të udhëhequr Chelsea drejt suksesit. Klubi po kalon një moment mjaft të vështirë në kampionat, teksa ndodhet në vendin e 11, shumë larg objektivave europiane për sezonin e ardhshëm. Trajneri i përkohshëm, Frank Lampard, u shpreh se do të bëjë më të mirën e mundshme për ekipin, deri në fund të sezonit.