Drejtuesit e Chelsea janë gati të rrisin ofertën e tyre financiare për shërbimet e mesfushorit të Brighton, Moises Caicedo. Klubi londinez ofroi zyrtarisht 55 milionë paundë për kartonin e ekuadorianit, por kjo ofertë fillestare u refuzua nga Brighton. Megjithatë, duket se Chelsea nuk ka ndërmend të dorëzohet.
Sipas prestigjozes Mirror në Angli, drejtuesit e Chelsea do të bëjnë shumë shpejt një ofertë të re për kartonin e Caicedo, që mendohet të jetë në shifrat e 65 milionë paundëve. Trajneri Graham Potter, i cili ishte nën drejtimin e Brighton përpara se të mbërrinte në Stamford Bridge, është një adhurues i madh i ekuadorianit. Në fakt, ishte pikërisht Potter ai që rekrutoi asokohe mesfushorin nga Independiente del Valle, për vetëm 4 milionë paundë.
Trajneri aktual i Brighton, Roberto De Zerbi, ka pranuar se Caicedo mund të largohet nga klubi, por tekniku dëshiron që lojtari të qëndrojë të paktën deri në fund të këtij sezoni në ekip. De Zerbi ka komentuar:
“Mentaliteti i Moises është fantastik. Atij nuk i nevojitet asgjë më shumë. Fakti që ekipet e mëdha në Europë e kërkojnë nuk është problem për atë… Ai është një lojtar i rëndësishëm, i fortë dhe i madh. Mendoj se ai mund të bëhet një nga mesfushorët më të mirë në Europë. Për mua është që tani, por në 2 vitet e ardhshme e sigurt, sepse është teknik dhe i fortë fizikisht.”
Tekniku i Brighton shtoi:
“Pyetja nëse do t’i shesim lojtarët tanë nuk është për mua, është për pronarin. Problemi nuk është të shesim. Problemi është të blejmë lojtarë të rinj me të njejtin potencial apo nivel si ata që shet. Për momentin, mendoj se klubi po punon mirë përsa i përket rekrutimit të lojtarëve të rinj.”
Mbetet të shohim nëse Brighton do të dorëzohet përballë presionit të Chelsea këtë merkato janari, apo Moises do të vazhdojë të jetë pjesë e klubit deri në fund të sezonit.