Chelsea ka arritur më në fund një marrëveshje me Sevilla, për shërbimet e mbrojtësit francez Jules Kounde. Blutë e Londrës do t’i paguajnë spanjollëve 55 milionë paundë për kartonin e lojtarit, teksa kjo i jep fund ndjekjes së gjatë që Thomas Tuchel ka bërë për të siguruar transferimin e mbrojtësit në Stamford Bridge.
Kounde pritet t’i nënshtrohet një ekzaminimi mjekësor rutinë ditën e nesërme. Mësohet se lojtari ka komunikuar tashmë me trajnerin Tuchel, dhe shpreson t’i bashkohet skuadrës në turin para-sezonal në Amerikë. Ky ishte afrimi i tretë i Chelsea në pak ditë, pas zyrtarizimit të Kalidou Koulibaly dhe Raheem Sterling.
Tuchel fillimisht tentoi të afronte Kounde tek Chelsea në janar. Negociatat dështuan për shkak të çmimit të kërkuar nga Sevilla, që në atë kohë pretendonte shumën e plotë që parashikonte klauzola e prishjes së kontratës. Më vonë në qershor, Kounde pësoi një dëmtim teksa aktivizohej në Nations League.
Kjo bëri që mbrojtësi t’i nënshtrohej një operacioni të vogël, duke rrezikuar kështu një lëvizje drejt Chelsea. Blutë e Londrës filluan të kërkonin për alternativa të tjera, mes tyre Nathan Ake i Manchester City. Por mesa duket, trajneri gjerman vendosi të kthehej përsëri tek francezi i Sevilla, duke firmosur përfundimisht me Kounde.
Chelsea ndërkohë është i gatshëm të bëjë një tjetër lëvizje në merkato, dhe bëhet fjalë për qendër-mbrojtësin e Leipzig, Josko Gvardiol. Kroati u aktivizua në 46 takime me klubin gjerman sezonin që lamë pas, duke kontribuar në suksesin në DFB Pokal, si dhe kualifikimin në Champions League.
Aftësitë e Gvardiol janë të padiskutueshme, dhe Chelsea ka vërtet nevojë për kualitet në repartin e mbrojtjes, sidomos pas largimeve të Andreas Christensen dhe Antonio Rudiger. Blutë e Londrës kanë rënë dakord mbi transferimin e Kalidou Kouliably dhe Jules Kounde, që do të thotë se nëse afrimi i Josko Gvardiol gjithashtu zyrtarizohet, ai do të jetë i treti mbrojtës që i bashkohet anglezëve këtë verë.