Mesfushori me tipare sulmuese i Tottenham, Dele Alli, mund të largohet nga klubi anglez në merkaton e janarit. Lojtari duket se nuk është në planet e trajnerit italian Antonio Conte dhe në rast se ky i fundit jep aprovimin për lëvizjen, presidenti i klubit, Daniel Levy do të miratojë pa problem lëvizjen.
Alli ka kohë që nuk është më titullar me “Spursat”, teksa në kohën kur klubin e drejtonte Jose Mourinho, anglezi nuk ia doli asnjëherë të bindte teknikun portugez mbi aftësitë e tij. E kundërta ndodhi gjatë periudhës kur ekipin e dretonte Mauricio Pochettino. Dele Alli u bë shndërrua në busullën e orientimit për skuadrën në mesfushë. Trajneri Nuno Espirito Santo pa të njejtin potencial tek anglezi, por me largimin e tij nga Tottenham, edhe shanset e Alli për të qënë titullar në ekip prekën fundin.
Futbollisti ka një kontratë të vlefshme me “Suprsat” deri në vitin 2024. Ky mund të jetë një problem potencial për Tottenham, pasi çmimi i kërkuar për kartonin e Alli do të jetë i lartë, duke marrë parasysh kontratën aktive. Kjo do të thotë se shumë klube mund të stepen për të shpenzuar shifra të mëdha për mesfushorin. Për këtë arsye, Tottenham po analizon dhe opsionin e huazimit të Alli për një periudhë të caktuar kohore.
Por cilat janë opsionet e futbollistit? Vitin e kaluar Alli ishte shumë pranë transferimit drejt PSG, por presidenti i Tottenham, Levy, e ndali operacionin. Duke marrë parasysh afrimet e fundit tek PSG, ky skenar duket se nuk është më i vlefshëm për mesfushorin anglez.
Burime jo zyrtare, bëjnë me dije se ekziston një interesim i disa klubeve rivale në Premier League për kartonin e Alli. Mes tyre, Aston Villa, Wolves dhe Newcastle. Eksperienca në njërin prej këtyre ekipeve mund t’i shërbejë lojtarit të Tottenham, për të treguar dhe një herë se potenciali dhe talenti i tij, janë të denjë për një skuadër të kalibrit të lartë.
