Jesse Lingard mesa duket ka hequr dorë nga ideja e nënshkrimit të një kontrate të re me United. Këtë bëjnë me dije raportimet më të fundit nga Express UK, ku sipas burimeve, situata e futbollistit ka tërhequr vëmendjen e trajnerit të ri të Tottenham, Antonio Conte. Italiani mësohet se është i interesuar në shërbimet e sulmuesit të kombëtares angleze.
28 vjeçari ka hasur shumë vështirësi në skuadrën e Ole Solskjaer, sidomos për të gjetur minuta në fushën e blertë. Lingard ka luajtur vetëm 63 minuta lojë në Premier League, që prej startit të sezonit. Vitin tjetër sulmuesit i skadon kontrata me “Djajtë e Kuq” dhe objektivi i Antonio Conte është nënshkrimi me kosto zero me futbollistin.
Disa javë më përpara, trajneri i United, Solskjaer, insistoi se Lingard do të kishte një rol të rëndësishëm në ekipin e tij. Por tashmë duket qartë se tekniku norvegjez nuk është treguar i sinqertë me lojtarin. Lingard do të jetë në gjendje të nënshkruajë një para-kontratë në janar, me çdo klub që mund të jetë i interesuar në shërbimet e tij.
Shumë ekipe në Premier League kërkojnë me ngulm kartonin e sulmuesit, por sipas ESPN, me ardhjen e Antonio Conte në krye të pankinës së Tottenham, janë Spursat ata që po kryesojnë momentalisht garën për transferimin e talentit.
Dëshira kryesore e Lingard është të gjejë një klub ku mund t’i ofrohet vendi i titullarit. Kjo është e rëndësishme për çdo futbollist, por për anglezin ka dhe një tjetër motivim. Lingard dëshiron të tregojë potencialin e tij, në mënyrë që të jetë pjesë e “3 Luanëve” në Botërorin e vititi 2022. Me konkurrencën e lartë në përfaqësuesen e drejtuar nga Gareth Southgate, çdo lojtar duhet të japë më të mirën e tij në nivel klubi, për të patur një shanc me kombëtaren angleze.
