Anglezët e Tottenham janë shumë pranë afrimit të mbrojtësit brazilian Emerson Royal nga skuadra e Barcelonës. Mbrojtësi 22 vjeçar ka kaluar 2 sezonet e fundit i huazuar tek skuadra e Betis, dhe ka arritur të shënojë 5 gola në 79 takime. Braziliani iu bashkua Barcelonës në vitin 2019 nga Atletico Mineiro, dhe ishte pjesë e kombëtares braziliane në Copa America këtë verë.
Me ardhjen e tij në Londër, lojtari pritet të luftojë për një vend në krahun e djathtë të mbrojtjes, teksa Japhet Tanganga dhe Matt Doherty mbulojnë të njejtin pozicion. Emerson ka avantazh minutat e luajtura, pasi mbrojtësi ishte lojtari me më shumë kohë në fushë, sezonin e kaluar me Real Betis. Roli i tij ishte kyç në suksesin e skuadrës, e cila e mbylli La Liga-n në vendin e 6, duke u kualifikuar në Europa League.
Ndërkohë nga ana tjetër, kapiteni i Liverpool, Jordan Henderson, ka rinovuar deri në vitin 2025 kontratën e tij me “The Reds”. 31 vjeçari që aktivizohet dhe me kombëtaren angleze, ka zhvilluar plot 394 paraqitje me Liverpool përgjatë kësaj dekade.
Së bashku me Henderson, ishin dhe Fabinho dhe Andy Robertson të cilët gjithashtu nënshkruan kontratë të re me klubin. Henderson u shpreh mjaft i lumtur pas zyrtarizimit:
“Të vazhdoj këtë rrugëtim është një gjë e jashtëzakonshme për mua. Është fantastike që gjithçka është mbyllur dhe mund të fokusohem totalisht tek e ardhmja.”
Që prej ardhjes së tij nga Sunderland në vitin 2011, Jordan Henderson ka fituar 5 trofe madhorë me “The Reds”. Mes tyre: League Cup, Premier League, Champions League, UEFA Super Cup dhe Fifa Club World Cup. Performancat e tij ishin deçizive në triumfin e parë në kampionat të Liverpool, pas më shumë se 30 vitesh pritje.
Henderson falenderoi fansat për mbështetjen në një postim në Twitter, duke u shprehur mirënjohës dhe krenar që mban veshur fanellën me peshë të “The Reds”.