Bomberi i Dortmund, Erling Haaland, ka dhënë së fundmi disa deklarata mjaft interesante mbi të ardhmen e tij, nga qyteti i Marbella në Spanjë, ku po bën pushimet. Sulmuesi ka postuar një foto në rrjetin social Instagram, ku thuhet: “6 muajt e ardhshëm do të jenë 6 muajt e mi më të mirë.”
Analistët sportivë dhe fansat janë munduar të kuptojnë mesazhin e Haaland, dhe kanë arritur në përfundimin se norvegjezi ka shprehur se do të qëndrojë deri në fund të sezonit tek Dortmund, dhe do të japë më të mirën e tij, si falenderim për fansat që e kanë mbështetur deri në këtë pikë.
Më pas, Haaland do të largohet në fund të sezonit, dhe sipas burimeve jo zyrtare, klubi gjerman i ka lënë kohë futbollistit, deri në përfundim të merkatos së janarit, për të vendosur mbi destinacionin e rradhës. Zhvillimet më të fundit, dhe deklaratat e agjentit Mino Raiola kanë bërë tashmë të qartë se sulmuesi i Dortmund do të transferohet në Spanjë, dhe sigurisht që bëhet fjalë për Real Madrid dhe Barcelonën. Por gara mes 2 gjigandëve spanjollë për kartonin e tij është ende e hapur.
Presidenti i katalanasve, Laporta, ka përsëritur disa herë se do të bëjë goditje të mëdha në merkato, dhe Barcelona do të rikthehet aty ku e meriton, mes më të mëdhenjëve. Kjo nënkupton se Laporta e ka një plan për të sjellë Haaland në Camp Nou, dhe këtu pritet të shfrytëzojë dhe miqësinë me agjentin e lojtarit Mino Raiola. Por sfidat kryesore të Barcelonës mbeten 2: Grumbullimi i aseteve financiare të nevojshme për operacionin, dhe bindja e Haaland se projekti sportiv i blaugranave është më i miri.
Ndërkohë nga krahu tjetër, Real Madrid gjendet në pozita më të mira financiare, dhe do të mundohet të shfrytëzojë dhe prestigjin e vet, për të joshur norvegjezin. Historia ka treguar se fituesi i Topit të Artë është gjendur gjithmonë tek galaktikët, dhe ky është një fakt që Haaland vështirë se mund ta injorojë.