Nëse Erling Haaland vendos të largohet nga Borussia Dortmund, lojtari preferon Real Madrid si destinacionin e tij të ardhshëm. Lajmi është konfirmuar për Goal.com nga burime jo zyrtare pranë sulmuesit. Talenti norvegjez është i vetëdijshëm se ka shumë klube europiane që kërkojnë kartonin e tij, por ende nuk ka marrë një vendim mbi të ardhmen. Megjithatë, galaktikët e drejtuar nga Carlo Ancelotti janë alternativa më tunduese për yllin e Dortmund.
Që prej transferimit tek Dortmund nga Red Bull Salzburg, në vitin 2020, Haaland ka konsoliduar statustin e tij si një nga sulmuesit më të mirë në arenën europiane. 21 vjeçari ka shënuar plot 70 gola në 69 paraqitjet e para me gjermanët. Por si është situata në lidhje me transferimin e tij dhe interesin e klubeve të tjera?
Agjenti i futbollistit, Mino Raiola, bëri me dije një fakt mjaft interesant së fundmi. Erling Haaland zotëron një shtëpi në Spanjë. Por kjo nuk do të thotë se detyrimisht, futbollisti ka vendosur tashmë se do të jetë pjesë e Los Blancos. Sipas Raiola, shumë gjëra mund të varen dhe nga Kylian Mbappe i Paris Saint-Germain, i cili është gjithashtu objektiv i Real Madrid.
Haaland e di se në qoftë se Mbappe gjithashtu bëhet pjesë e Real Madrid, ai duhet të ndajë hapësirat dhe mbase dhe minutat me yllin francez. Ndërkohë presidenti i madrilenëve, Florentino Pérez, ka gjithashtu dilemat e tij nëse një transferim i dyfishtë, pra i Mbappe dhe Haaland në të njejtën kohë, favorizon klubin e tij.
Por cili është qëndrimi i Dortmund? Drejtori i ekipit të parë të futbollit të klubit, Sebastian Kehl, ka premtuar se gjermanët do të luftojnë për të mbajtur Haaland ende nën kontratë, deri në vitin 2024, siç parashikohet në marrëveshjen ekzistuese mes klubit dhe sulmuesit.
Ndërkohë Anglia është gjithashtu një destinacion potencial, por sipas raportimeve, Haaland ende nuk ka një klub të preferuar në Premier League.