Trajneri i Manchester City, Pep Guardiola ka konfirmuar interesin e klubit për sulmuesin e Tottenham, Harry Kane. Gjithsesi, spanjolli ka thënë se Leo Messi nuk është në planet e Manchester City në këtë merkato vere. Në lidhje me transferimin e Kane, Pep deklaroi:
“Jemi të interesuar për të, por nëse Spursat nuk duan të negociojnë, nuk kemi se çfarë të themi. Nëse ata janë të hapur ne do të përpiqemi të bisedojmë, kjo është e gjitha. E gjitha varet nga Tottenham.
Me Jack Grealish ishte situatë e ndryshme pasi lojtari kishte një klauzolë për prishjen e kontratës. Nëse ata (Totenham) janë të interesuar për të diskutuar në lidhje me Kane, Manchester City dhe të gjitha klubet në botë do të duan të firmosin me të.”
“Qytetarët” kanë qenë vazhdimisht të përfolur dhe për një transferim të mundshëm të Lionel Messit, me të cilin Guardiola ka punuar te Barcelona, duke arritur suskese historike. Katalanasit njoftuan se 34 vjeçari do të lërë klubin për shkak të pamundësive financiare të spanjollëve për ta mbajtur atë në ekip, duke respektuar rregullat e fair play-it financiar. Sigurisht, Guardiola nuk mund të mos komentonte për këtë zhvillim:
“Ishte një surprizë për të gjithë, përfshirë dhe mua. Kur ke 487 milionë euro humbje në vit, fatkeqësisht vendimi ishte i pashmangshëm. Si një tifoz do doja ta shihja të përfundonte karrierën atje (Barcelona), por nuk është e mundur.
Kam shumë mirënjohje për lojtarin më të jashtëzakonshëm që kam parë në jetën time, për titujt, dhe për atë që bëri për mua, duke më ndihmuar të shkoj në Munich dhe Angli.”
Pas lëvdatave për argjentinasin, trajneri spanjoll konfirmoi se Leo nuk është më në planet e City:
“Shpenzuam për Jack Grealish dhe do të jetë ai që do të veshë numrin 10 pasi jemi të bindur për të, dhe menduam se Messi do të qëndronte. Tani Leo nuk është më në planet tona.”
