Sipas lajmeve më të fundit të merkatos, Harry Kane është pranë një transferimi rekord drejt Manchester City, për shifrën e 160 milionë paundëve. Nëse lëvizja konkretizohet, do të jetë një rekord i ri financiar në Premier League, dhe 27 vjeçari do të përfitojë plot 400.000 paundë në javë.
Mësohet se City është gati të përfshijë në marrëveshje dhe një prej superstarëve të skuadrës së tyre, për të joshur Tottenham drejt finalizimit të lëvizjes. Ndër lojtarët që mund të përfshihen në transferimin e Kane janë: Gabriel Jesus, Riyad Mahrez, Bernardo Silva, apo dhe sulmuesi i Anglisë, Raheem Sterling.
Ndërkohë, Spurs nga ana e tyre janë në kërkim të një mbrojtësi dhe sytë i kanë tek Cristian Romero i Atalantës. 23 vjeçari argjentinas i përshtatet mirë modelit të lojës të Tottenham. Për këtë arsye, burime jo zyrtare bëjnë të ditur se anglezët kanë ofruar 34 milionë paundë për shërbimet e mbrojtësit, plus 8 milionë paundë të tjera përfitime nga kontrata. Marrëveshja mund të arrihet dhe në formën e një shkëmbimi, duke marrë parasysh se vet Atalanta është e interesuar për mbrojtësin e Tottenham, Davinson Sanchez.
Nga Franca vijnë gjithashtu lajme mjaft interesante përsa i përket merkatos. Kylian Mbappe pritet të refuzojë ofertën e fundit të PSG për rinovim kontrate. Arsyeja mbetet ajo që është përfolur gjatë çdo merkatoje të sezoneve të fundit. Superstari francez ëndërron të luajë për Real Madrid. Kylian Mbappe e ka bërë shpesh herë publik admirimin që ka për klubin spanjoll, dhe për PSG po bëhet gjithnjë e më e vështirë që të mbajë 22 vjeçarin në Paris. Edhe një bashkim i mundshëm me shokun e tij të kombëtares, Paul Pogba, duket se nuk është një arsye bindëse që Mbappe të rinovojë me francezët.
Kujtojmë se presidenti i Real Madrid, Florentino Pérez, ka shprehur hapur dëshirën që Mbappe t’i bashkohet galaktikëve, dhe do të bëjë çmos për të siguruar një marrëveshje.
