Bordi drejtues i Manchester United ka përpiluar një “short-list”, me 4 kandidatë kryesorë për postin e trajnerit të “Djajëve të Kuq”. Trajneri i përkohshëm Ralf Rangnick do të largohet në fund të sezonit dhe klubi do të duhet të shpejtojë, në rast se kërkon të sjellë në krye të pankinës së Old Trafford, një emër të denjë.
Mauricio Pochettino, Erik ten Hag, Julen Lopetegui dhe Luis Enrique janë opsionet që po diskutohen nga drejtuesit e klubit anglez. Së fundmi në media është përmendur dhe emri i teknikut gjerman të Chelsea, Thomas Tuchel, por burime nga United kanë hedhur poshtë këto pretendime.
Pochettino dhe Ten Hag thuhet se kryesojnë momentalisht garën për stolin e “Djajëve të Kuq”, teksa shumë anëtarë të bordit kanë dyshime serioze për filozofinë e lojës së Lopetegui dhe Enrique. Disa zëra brenda United pretendojnë se modelet e lojës së këtyre të fundit, nuk do t’i përshtateshin mirë një klubi si Manchester.
Suporti është më i lartë për Pochettino, duke marrë parasysh eksperiencën e tij në Premier League. Gjatë kohës që argjentinasi drejtonte Tottenham, ai ia doli të luftonte mjaft mirë përballë ekipeve si Liverpool dhe Manchester City, duke regjistruar paraqitje mbresëlënëse. Kujtojmë se tek Tottenham resurset e tij ishin mjaft të kufizuara në krahasim me kundërshtarët, problem që Pochettino nuk do ta ketë tek United, nëse i bashkohet klubit.
Hollandezi Ten Hag është gjithashtu një alternativë që pëlqehet shumë nga klubi. Por për trajnerin e Ajax ka ende shumë pikëpyetje mbi përshtatjen e tij në një strukturë komplet të re si ajo e United. Presioni për të arritur rezultate dhe për të fituar trofe është shumë më i madh në Angli.
Drejtuesit e klubit kanë bërë me dije se trajneri i ardhshëm i skuadrës me siguri do të jetë një nga 4 emrat e përmendur, vetëm nëse ndodh një ndryshim i papritur dhe një trajner tjetër i klasit botëror është i disponueshëm.
