Liverpool do t’i jape prioritet, transferimit të Jude Bellingham nga Borussia Dortmund, gjatë merkatos së verës. Sipas portalit CaughtOffside, burime të afërta pranë “The Reds” kanë bërë me dije se ekziston një optimizëm i lartë për afrimin e mesfushorit anglez në Anfield.
Bellingham është linkuar me Liverpool dhe më parë, ndërkohë që klube elitare si Manchester United, Manchester City dhe Chelsea gjithashtu mendohet të jenë në ndjekje të 18 vjeçarit. Megjithëse Bellingham është ende një lojtar i ri dhe pa shumë eksperiencë, Jurgen Klopp beson se veteranët e klubit mund ta ndihmojnë anglezin të konsolidojë vendin e tij në ekip, duke garantuar kështu dhe ecurinë e Liverpool në të ardhmen.
Drejtuesit e “The Reds” besojnë se trajneri gjerman është asi i tyre ndër mëngë, për të bindur Bellingham që t’i bashkohet atyre. Kjo pasi Klopp ka dhënë tashmë disa herë prova se lojtarët e rinj zhvillohen mjaft mirë nën eksperiencën e tij.
Por transferimi i Bellingham varet dhe nga situate e Erling Haaland me Dortmund. Duke marrë parasysh se sipas të gjitha gjasave, Haaland mund të largohet në verë drejt Real Madrid, apo një klubi tjetër, drejtuesit e Dortmund nuk dëshirojnë që të humbasin 2 yjet e tyre kryesorë, brenda 1 merkatoje.
Gjermanët kanë shitur dhe më parë yjet e tyre në të kaluarën, por ka pasur raste të tjera kur janë treguar “kokëfortë”. Kjo ndodhi me interesimin e Manchester United për Jadon Sancho, i cili u largua drejt anglezëve vetëm në momentin që Dortmund e pa të përshtatshëm. Për më shumë, gara për titullin e Bundesliga këtë sezon është ende e hapur. Bayern Munich kryeson momentalisht renditjen, por Dortmund gjendet në vendin e dytë me vetëm 6 pikë më pak.
Largimi i Haaland dhe Bellingham do të ishte një goditje e madhe për Dortmund, në garën për titull kampion.