Sipas raportimeve të ESPN, francezët e Paris Saint-Germain janë gjithnjë e më të bindur se mund t’i mbushin mendjen Kylian Mbappe, për të mos u larguar nga ekipi. Mediat bëjnë me dije se familja e sulmuesit është në bisedime me klubin për mundësinë e një rinovimi afatshkurtër, dhe deri më tani, situata duket pozitive.
Megjithatë, Real Madrid është ende i bindur se mund të nënshkruajë me francezin këtë verë. Drejtuesit e La Ligës ishin afër rekrutimit të tij merkaton e kaluar, por burimet e ESPN bënë me dije se PSG refuzoi ofertën prej 200 milionë eurosh nga madrilenët në gusht. Ndërkohë në dhjetor, Mbappe përjashtoi mundësinë e largimit nga PSG në mes të sezonit, por sipas burimeve, presidenti i Real Madrid, Florentino Perez është i bindur se mund të sigurojë një marrëveshje për sulmuesin, me kosto zero në verë.
PSG nga ana tjetër, është në bisedime me Paul Pogba dhe Franck Kessie, dhe nënshkrimi i këtyre lojtarëve do të ndihmonte për të bindur Mbappe, se klubi po ecën në drejtimin e duhur. Ndërsa një tjetër faktor që ndihmon parizienët është se në dhomën e zhveshjes me emra yjesh si Neymar, Lionel Messi dhe Sergio Ramos, Mbappe duket se ka gjetur rolin që e ka dashur gjithmonë në klub. Sulmuesi është bërë një lider i padiskutueshëm në skuadër, duke marrë parasysh se Leo Messi dështoi të kishte impaktin e parashikuar, përpara se të debutante me PSG. Mbappe ka qenë një nga lojtarët më të spikatur tek ekipi i tij, këtë sezon, pavarësisht mungesës së një strukture kolektive në skuadër.
Lajmi se Zinedine Zidane mund të jetë trajneri i ardhshëm që do të zbarkojë në Parc des Princes, mund të jetë një tjetër faktor që Mbappe, të rishikojë dhe një herë planet e tij për të ardhmen.
