Ish-mbrojtësi spanjoll i Barcelonës, Jordi Alba, do t’i bashkohet Messi dhe Busquets, tek Inter Miami në USA. Lajmi është konfirmuar nga vet presidenti i klubit, Jorge Mas, i cili konfirmoi se Alba do të ribashkohet me ish-shokët e tij të skuadrës tek Barcelona. Mbrojtësi u largua nga gjigandët katalanas këtë verë, pas skadimit të kontratës. Alba pati një karrierë të paharrueshme tek Barcelona për më shumë se 10 vite, ku fitoi disa herë titullin kampion në La Liga, si dhe Champions League.
Messi dhe Busquets ndërkohë kanë firmosur kontrata deri në vitin 2025 me klubin amerikan. Dy ish-lojtarët e Barcelonës u prezantuan zyrtarisht si pjesë e Inter Miami përballë një turme prej 20 mijë fansash entuziastë, për ardhjen e superstarëve në MLS. Messi u stërvit për herë të parë me shokët e tij të rinj të ekipit këtë javë, dhe pritet të debutojë me Inter Miami ditën e premte përballë Cruz Azul të Mexico City.
Ndërkohë, duket se Inter Miami nuk ka ndërmend të ndalet këtu me afrimet e lojtarëve të rinj. Në portalet sportive ka qarkulluar lajmi se Luis Suarez gjithashtu është i prirur të luajë për amerikanët. Presidenti i klubit, Jorge Mas, u shpreh se pavarësisht se ende nuk ka bisedime direkte mes Inter Miami dhe lojtarit, sulmuesi është i mirëpritur në klub:
“Ka pasur shumë fjalë mbi ardhjen e mundshme të Luis Suarez këtu. Nuk kemi patur bisedime direkte me Suarez apo Gremio. Nuk e di sesi Suarez mund të largohet nga Gremio. Por nëse ia del, jemi të lirë të flasim me Luis dhe ta sjellim atë tek Inter Miami. Mundësia është aty.”
Ardhja e yjeve të rinj në MLS ka rritur akoma më shumë prestigjin e kampionatit amerikan, teksa lojtarë të tjerë janë duke konsideruar më seriozisht, një transferim në ligën në rritje.
